Lean HR៖ ឧទាហរណ៍ អត្ថប្រយោជន៍ និងកន្លែងដែលត្រូវចាប់ផ្តើម
នាយកដ្ឋានធនធានមនុស្ស ស្ថិតនៅក្រោមសម្ពាធកាន់តែខ្លាំងឡើង ដើម្បីធានាបាននូវភាពជោគជ័យនៃអាជីវកម្ម តាមរយៈការអនុវត្តធនធានមនុស្សប្រកបដោយប្រសិទ្ធភាព។ Lean HR អាចជួយឱ្យអង្គការកែលម្អដំណើរការ ដែលនាំទៅដល់ការបង្កើនផលិតភាព និងការអនុវត្តកាន់តែប្រសើរ។ តើអ្វីទៅជា Lean HR និងអត្ថប្រយោជន៍របស់វា ហើយតើអ្នកអាចអនុវត្តវិធីសាស្រ្តនេះនៅអង្គភាពរបស់អ្នកដោយរបៀបណា?
មាតិកា
- តើវិធីសាស្រ្ត Lean គឺជាអ្វី? (What is lean methodology?)
- តើអ្វីទៅគឺជា Lean HR? (What is lean HR?)
- តើអ្វីទៅជាអត្ថប្រយោជន៍នៃ Lean HR? (What are the benefits of lean HR?)
- ការអនុវត្ត Lean HR នៅក្នុងអង្គភាពរបស់អ្នក (Implementing lean HR at your organization)
១. តើវិធីសាស្រ្ត Lean គឺជាអ្វី? (What is lean methodology?)
វិធីសាស្រ្ត Lean គឺជាវិធីសាស្រ្តគ្រប់គ្រងយ៉ាងសកម្មវាងវៃក្នុងការបង្កើតលទ្ធផលដ៏មានគុណតម្លៃបន្ថែមទៀត ដោយការកែលម្អរំហូរការងារ។ វាលុបបំបាត់សកម្មភាពដែលខ្ជះខ្ជាយ ឬ លែងត្រូវការតទៅទៀត ដោយវាស់គុណភាពនៅជំហាននីមួយៗ ដូច្នេះរាល់មុខងាររបស់អង្គភាពដំណើរការប្រកបដោយប្រសិទ្ធភាព។ ភាគីពាក់ព័ន្ធ មានទំនាក់ទំនងយ៉ាងល្អនៅក្នុងដំណើរការធ្វើការសម្រេចចិត្ត ដើម្បីបង្កើតវប្បធម៌នៃការកែលម្អជាបន្តបន្ទាប់ ដែលសម្រួលដំណើរការ និងប្រើប្រាស់ទេពកោសល្យ។
ទ្រឹស្ដី Lean បានចាប់ផ្តើមជាមួយនឹង “Lean Production”។ ក្រុមហ៊ុនតូយ៉ូតា បានបង្កើតវាឡើង ដើម្បីច្នៃប្រតិដ្ឋដំណើរការផលិតរថយន្តរបស់ខ្លួន។ គោលបំណង គឺដើម្បីរក្សាកម្រិតសារពើភណ្ឌនៅត្រឹមតែអ្វីដែលត្រូវការក្នុងរយៈពេលខ្លីប៉ុណ្ណោះ ហើយរៀបចំឡើងវិញតាមការចាំបាច់។ ផលិតកម្ម Lean ក៏ផ្តល់គុណតម្លៃដល់និយោជិតជាធនធានកណ្តាលសម្រាប់វិធីកែលម្អរំហូរការងារ។ អ្នកគ្រប់គ្រង ធ្វើការទំនាក់ទំនងព័ត៌មានអាជីវកម្មជាមួយកម្មករនិយោជិតដោយបើកចំហ និងលើកទឹកចិត្តពួកគេឱ្យបញ្ចេញយោបល់សម្រាប់ការបង្កើនប្រសិទ្ធភាព។
ប្រភេទមួយទៀតនៃទ្រឹស្ដី Lean គឺវិធីសាស្ត្រ “Lean Start Up”។ វាត្រូវបានបង្កើតឡើងសម្រាប់សហគ្រិនក្នុងការផ្សព្វផ្សាយផលិតផល សេវាកម្ម និងគំនិតថ្មីៗ។ វាត្រូវបានផ្អែកលើការបង្កើត “ផលិតផលដែលអាចដំណើរការបានជាអប្បបរមា” (Minimum Variable Product – MVP) ដើម្បីសាកល្បងគំនិតមួយ។ ស៊េរីនៃការពិសោធន៍ដែលបង្កើតឡើងដោយរហ័សយ៉ាងប្រុងប្រយ័ត្ន បង្ហាញពីអ្វីដែលដំណើរការ និងមិនដំណើរការមុនពេលបង្កើតផលិតផលចុងក្រោយ។
ភាពជោគជ័យរបស់ Lean នៅក្នុងឧស្សាហកម្មដំបូងដែលទទួលយកវា បានដឹកនាំវិស័យផ្សេងទៀតជាច្រើនដើម្បីទទួលយកវាដែរ រួមទាំងអង្គភាពរដ្ឋាភិបាលសហរដ្ឋអាមេរិកផងដែរ។ វិធីសាស្រ្ត Lean គឺជាឧបករណ៍មួយដែលរដ្ឋវ៉ាស៊ីនតោន (Washington State) បានប្រើដើម្បីផ្លាស់ប្តូរប្រតិបត្តិការរបស់ខ្លួន និងបំពេញ ឬលើសពីគោលដៅជាក់លាក់។ ដំណើរការដែលប្រសើរឡើង និងការកែលម្អផ្សេងទៀត នាំឱ្យការផ្តល់សេវាកាន់តែលឿន ការសន្សំថ្លៃដើម និងកាត់បន្ថយការងារឯកសារ។
នៅពេលដែលស្ថាប័នខិតខំកែលម្អដំណើរការជាបន្តបន្ទាប់ ពួកគេអាចធ្វើការកែប្រែបានយ៉ាងឆាប់រហ័ស និងរលូន។ ការកែតម្រូវបន្តិចបន្តួច គឺអាចធ្វើទៅបានដើម្បីអនុម័ត និងអាចអត់ធ្មត់បានដោយនិយោជិត ជាជាងការអនុវត្តន៍ការផ្លាស់ប្តូរ។ ក្រុមហ៊ុនដែលដំណើរការក្នុងរបៀប Lean អាចជំរុញការកែលម្អសំខាន់ៗឱ្យកាន់តែមានភាពច្នៃប្រតិដ្ឋ និងមានប្រសិទ្ធភាព។
ធាតុផ្សំនៃវិធីសាស្រ្ត Lean
មូលដ្ឋាននៃវិធីសាស្រ្ត Lean គឺកំណត់គោលដៅសកម្មភាពដែលមិនមានប្រយោជន៍សម្រាប់ការលុបបំបាត់ចោល។ កាកសំណល់ ត្រូវបានទទួលស្គាល់ថាជានីតិវិធីណាមួយដែលមិនរួមចំណែកដល់គុណតម្លៃនៃផលិតផល ឬ សេវាកម្មចុងក្រោយ។ ការគ្រប់គ្រង Lean តម្រូវឱ្យពិនិត្យឡើងវិញនូវដំណាក់កាលនីមួយៗនៃដំណើរការអាជីវកម្ម ដើម្បីបែងចែករវាងគុណតម្លៃ និងកាកសំណល់ ដោយអនុវត្តធាតុផ្សំបីដូចខាងក្រោម៖
- ជំហានទាំងឡាយដែលចាំបាច់ និងបន្ថែមគុណតម្លៃ
- ជំហានទាំងឡាយដែលមិនបន្ថែមគុណតម្លៃ ប៉ុន្តែចាំបាច់ដោយសារតែបទប្បញ្ញត្តិ ច្បាប់ ឬ កត្តាដែលមិនអាចជៀសវាងបានផ្សេងទៀត
- ជំហានទាំងឡាយដែលមិនផ្តល់គុណតម្លៃ និងមិនចាំបាច់
ដោយឥតសង្ស័យ ការដកចេញនូវជំហានទាំងឡាយណាដែលមិនផ្តល់គុណតម្លៃ គឺជាវិធីសាមញ្ញបំផុតក្នុងការរៀបចំដំណើរការឡើងវិញ និងកែលម្អរំហូរការងារ និងលទ្ធផល។
២. តើអ្វីទៅគឺជា Lean HR? (What is lean HR?)
ប្រភពនៃគុណតម្លៃចម្បងរបស់ស្ថាប័ន គឺបុគ្គលិករបស់ខ្លួន។ ទំនួលខុសត្រូវរបស់ HR គឺរៀបចំប្រព័ន្ធ និងបរិយាកាសដែលមានឥទ្ធិពលលើកម្លាំងការងារដ៏ល្អប្រសើរ ដើម្បីគាំទ្រដល់ដំណើរការអាជីវកម្ម។ គោលដៅចុងក្រោយនៃ Lean HR គឺដើម្បីបន្តធ្វើការឆ្ពោះទៅរកការលុបបំបាត់ភាពមិនដូចគ្នា និងខ្ជះខ្ជាយ នៅក្នុងដំណើរការធនធានមនុស្ស និងការផ្តល់សេវាធនធានមនុស្ស។
នាយកដ្ឋានធនធានមនុស្ស គួរតែចាប់ដៃគូជាមួយភាពជាអ្នកដឹកនាំ ដើម្បីលើកកម្ពស់ផ្នត់គំនិត Lean សម្រាប់អង្គភាពទាំងមូល។ លើសពីនេះ វាត្រូវតែដំណើរការសេវាកម្មរបស់ខ្លួនឱ្យមានប្រសិទ្ធភាពតាមដែលអាចធ្វើទៅបាន ដោយខិតខំធ្វើឱ្យដំណើរការបន្តប្រសើរឡើង។
ទោះបីជាសេវាកម្មទាំងនេះមិនចាំបាច់ផ្តល់នូវផលិតផលជាក់ស្តែងក៏ដោយ ការបញ្ជូនឲ្យរបស់ពួកគេ អាចត្រូវបានកែលម្អ ដើម្បីបំពេញតម្រូវការរបស់បុគ្គលិកកាន់តែប្រសើរ។ ដូច្នេះសំណួរសួរថា តើយើងអាចអនុវត្តវិធីសាស្ត្រ Lean ចំពោះធនធានមនុស្សដោយរបៀបណា ដើម្បីធានាបាននូវជោគជ័យរយៈពេលវែង?
ការគ្រប់គ្រង Lean HR វាយតម្លៃតម្លៃនៃបរិយាកាសសេវាកម្មរបស់ខ្លួនដោយសួរសំណួរដូចជា៖
- តើមានដំណើរការសម្រាប់ភារកិច្ចនៃសេវាកម្មនីមួយៗដែរឬទេ?
- តើដំណើរការត្រូវបានអនុវត្តទេ?
- តើមានវិធីកែប្រែ ឬ ជំហានដែលអាចត្រូវបានលុបបំបាត់ ដើម្បីធ្វើឱ្យវាកាន់តែមានប្រសិទ្ធភាពទេ?
ឧទាហរណ៍ គោលគំនិត Lean អាចត្រូវបានអនុវត្តចំពោះមុខងារដូចខាងក្រោម៖
- ការជ្រើសរើស និងជួល (Recruitment and hiring) – តើផ្លូវផ្ទាល់បំផុតត្រូវបានធ្វើតាម ដើម្បីចម្រាញ់បេក្ខជន និងធានាសុវត្ថិភាពបុគ្គលិកថ្មីឬទេ?
- ការចាប់ផ្តើមការងារ (Onboarding) – តើការងារឯកសារ និងសកម្មភាពតម្រង់ទិស ត្រូវបានសម្រួលដើម្បីឲ្យអ្នកជួលថ្មីត្រៀមរួចជាស្រេចសម្រាប់សកម្មភាពឆាប់ៗទេ?
- ប្រាក់បំណាច់ និងអត្ថប្រយោជន៍ (Compensation and benefits) – តើនិយោជិតបានដឹងយ៉ាងច្បាស់អំពីអត្ថប្រយោជន៍របស់ពួកគេ និងផ្លូវសម្រាប់ការសម្រេចបាននូវការដំឡើងប្រាក់ឈ្នួល និងប្រាក់រង្វាន់ដែរឬទេ? តើការប្រាស្រ័យទាក់ទងប្រកបដោយប្រសិទ្ធភាពជាងមុនអាចជួយបញ្ជាក់ពីប្រធានបទនៃរង្វាន់បានទេ?
- ការគ្រប់គ្រងការអនុវត្ត (Performance management) – តើអ្នកគ្រប់គ្រង និងនិយោជិតតម្រូវឱ្យលះបង់ពេលវេលាច្រើនពេក ដើម្បីកំណត់គោលដៅ ការវាស់វែងវឌ្ឍនភាព និងវាយតម្លៃការអនុវត្តដែរឬទេ? តើយើងអាចបង្រួមដំណើរការនេះបានទេ?
នេះគឺជារូបភាពចំនួនប្រាំបីនៃធាតុផ្សំដែលមិនបន្ថែមគុណតម្លៃ ដែលអ្នកជំនាញធនធានមនុស្សអាចកំណត់អត្តសញ្ញាណ និងដកចេញដោយអនុវត្តវិធីសាស្រ្ត Lean ៖
- សារពើភ័ណ្ឌ (Inventory)៖ (ការរក្សាទុកទិន្នន័យដែលលែងប្រើ ឬ ហួសម័យ) ចូររកមើលវិធីដើម្បីលុបព័ត៌មានដែលផុតកំណត់ និងកាត់បន្ថយតម្រូវការក្នុងការរក្សាច្បាប់ចម្លងរឹង (hard copies) នៃឯកសារបុគ្គលិក/បេក្ខជន ។ល។
- កំពុងរង់ចាំ (Waiting)៖ (ការងារត្រូវបានជាប់គាំង ខណៈពេលដែលកំពុងរង់ចាំព័ត៌មានជាក់លាក់ ឬ ព័ត៌មានផ្សេងទៀតដើម្បីបំពេញផ្នែកនៃដំណើរការរបស់ពួកគេ។) ចូរពិនិត្យមើលហត្ថលេខា/ការយល់ព្រមដែលត្រូវការ ដើម្បីធ្វើស្តង់ដារសម្រាប់តែអ្វីដែលចាំបាច់ប៉ុណ្ណោះ។ បុគ្គលិកដែលឆ្លងកាត់ការបណ្តុះបណ្តាល អាចគ្របដណ្តប់គ្នាទៅវិញទៅមកដើម្បីរក្សារំហូរការងារ។
- ដំណើរការលើស (Excess processing)៖ (ការចាត់ចែងកិច្ចការ ឬ ទិន្នន័យដែលមិនបន្ថែមគុណតម្លៃសម្រាប់អតិថិជន) ចូររកមើលវិធីដើម្បីជៀសវាងស្រទាប់ការយល់ព្រម របាយការណ៍ និងការបញ្ចូលទិន្នន័យឡើងវិញដែលមិនចាំបាច់។
- ចលនា (Motion)៖ (ចលនាដែលមិនចាំបាច់របស់មនុស្ស ឬ ទំនិញ) ការដាក់ឧបករណ៍ ergonomic, ប្រព័ន្ធផ្គត់ផ្គង់ឯកសារ និងដាក់ឯកសារយោងយ៉ាងងាយស្រួល និងការរក្សាសមាជិកក្រុមឱ្យនៅជិត អាចជួយសន្សំសំចៃពេលវេលារបស់មនុស្សរវាងកិច្ចការទាំងឡាយ។
- ការដឹកជញ្ជូន (Transportation)៖ (ដំណើរការដែលពាក់ព័ន្ធនឹងការធ្វើដំណើរតាមរយៈការតភ្ជាប់ច្រើនពេក) ក្រុម និងអង្គភាព អាចជៀសវាងការខ្ជះខ្ជាយប្រភេទនេះ ដោយសម្រួលការបញ្ជូនរបាយការណ៍ កាត់បន្ថយឯកសារភ្ជាប់អ៊ីមែល និងលុបចោលការចែកចាយឯកសាររឹង។
- ទេពកោសល្យ (Talent)៖ (ការប្រើប្រាស់សមត្ថភាពរបស់និយោជិត) ចូរផ្តល់សិទ្ធិអំណាចដល់បុគ្គលិកឱ្យសម្រេចការងារបានកាន់តែច្រើន។ ចូរផ្តល់ឱ្យពួកគេនូវឧបករណ៍ និងការបណ្តុះបណ្តាលគ្រប់គ្រាន់ និងអនុញ្ញាតឱ្យពួកគេអនុវត្តការកែលម្អដំណើរការនៅក្នុងវិសាលភាពនៃការទទួលខុសត្រូវរបស់ពួកគេ។
- ភាពខ្វះខាត (Defects)៖ (កំហុសក្នុងដំណើរការ ឬ លទ្ធផលអវិជ្ជមានដែលត្រូវការការកែប្រែឡើងវិញ។) ឧទាហរណ៍ កង្វះខាតនៃនីតិវិធីការងារដែលមានស្តង់ដារ ដែលនាំឱ្យមានកំហុសក្នុងការបញ្ចូលទិន្នន័យ ឬ វិធីសាស្ត្រជួលខុស ដែលនាំឲ្យមានការលាឈប់ខ្ពស់ (high turnover) និងត្រូវការដំណើរការឡើងវិញ។
- ការផលិតហួសហេតុ (Overproduction)៖ (បង្កើតព័ត៌មានដែលមិនត្រូវការ ឬ មិនធ្លាប់ប្រើប្រាស់ ឬ ផ្គត់ផ្គង់អ្វីមួយច្រើនជាងតម្រូវការ ឬ មុនពេលដែលវាត្រូវបានទាមទារ) ការវាយតម្លៃការប្រើប្រាស់ និងគុណតម្លៃនៃព័ត៌មាន និងរបាយការណ៍ទាំងអស់ និងការបង្កើតលំដាប់នៃដំណើរការការងារ ស្តង់ដារ និងសញ្ញា សម្រាប់ដំណើរការនីមួយៗនឹងបញ្ជាក់អំពីប្រភេទនៃការខ្ជះខ្ជាយនេះ។
៣. តើអ្វីទៅជាអត្ថប្រយោជន៍នៃ Lean HR? (What are the benefits of lean HR?)
ការអនុវត្តគំរូ Lean HR បង្កើតអត្ថប្រយោជន៍ជាច្រើនសម្រាប់អង្គភាពនៅក្នុងឧស្សាហកម្មណាមួយ ដោយការកែលម្អដំណើរការសម្រាប់អ្នកពាក់ព័ន្ធទាំងអស់ និងលើកទឹកចិត្តឱ្យមានការកែលម្អជាបន្តបន្ទាប់។ អ្នកអាចកំណត់អត្តសញ្ញាណភាពជាប់គាំង ហើយបន្ទាប់មករៀបចំបែបបទឡើងវិញ ដើម្បីលុបវាចេញ។ នេះនាំឱ្យមានអត្ថប្រយោជន៍យ៉ាងច្រើន រួមទាំង៖
- ការកាត់បន្ថយថ្លៃដើម (Cost reduction) – ការកាត់បន្ថយការខ្ជះខ្ជាយ ជួយសន្សំសំចៃថវិកា ដូច្នេះការផ្តោតលើ Lean ជួយបង្កើនប្រាក់ចំណេញ។
- ការលើកកម្ពស់គុណភាព (Quality enhancement) – ផ្នត់គំនិតយកចិត្តទុកដាក់ចំពោះព័ត៌មានលម្អិត ធ្វើឱ្យដំណើរការការងារប្រសើរឡើង និងកាត់បន្ថយកំហុស។
- វប្បធម៌អភិវឌ្ឍន៍ (A development culture) – នៅពេលដែលមនុស្សផ្តោតការគិតរបស់ពួកគេលើការស្វែងរកការផ្លាស់ប្តូរឱ្យកាន់តែប្រសើរឡើង វាជំរុញបរិយាកាសនៃការបើកចំហរសម្រាប់វឌ្ឍនភាព និងមោទកភាពក្នុងការបន្ថែមគុណតម្លៃជាមួយនឹងការងាររបស់ពួកគេ។
- ការកែលម្អបទពិសោធន៍បុគ្គលិក (Employee experience improvement) – នៅពេលដែលដំណើរការត្រូវបានកែលម្អ ការងារអាចកាន់តែងាយស្រួល និងរីករាយសម្រាប់បុគ្គលិក។ គោលការណ៍ Lean ដែលលើកទឹកចិត្តឱ្យមានការសន្ទនាដោយបើកចំហ និងផ្តល់ឱ្យបុគ្គលិកនូវសមត្ថភាពក្នុងការស្នើការផ្លាស់ប្តូរ អាចបង្វែរការខកចិត្តនៃបញ្ហាទៅជាឱកាស ដើម្បីបង្កើតដំណោះស្រាយ។ វាលើកកម្ពស់បរិយាកាសការងារដែលលើកទឹកចិត្ត និងពេញចិត្តជាងមុន ដែលជំរុញឱ្យមានសក្តានុពលបុគ្គលិកជាអតិបរមា។
៤. ការអនុវត្ត Lean HR នៅក្នុងអង្គភាពរបស់អ្នក (Implementing lean HR at your organization)
ដូច្នេះ តើវាត្រូវការអ្វីពិតប្រាកដ ដើម្បីដាក់គំរូ Lean HR ចូលទៅក្នុងសកម្មភាព? នេះគឺជាជំហានបី ដែលត្រូវពិចារណាសម្រាប់ការចាប់ផ្តើមវា នៅក្នុងនាយកដ្ឋានរបស់អ្នក៖
១. កំណត់ដំណើរការធនធានមនុស្សសំខាន់ៗ (Identify key HR processes)
អ្នកត្រូវកំណត់គោលដៅដំណើរការធនធានមនុស្ស ដែលការអនុវត្តន៍វិធីសាស្រ្ត Lean គឺអាចគណនាបាន និងសមហេតុផលបំផុត។ ជាធម្មតា ទាំងនេះរួមមានដំណើរការជ្រើសរើសបុគ្គលិក ការបណ្តុះបណ្តាល និងអភិវឌ្ឍន៍ ការចាប់ផ្តើម (Onboarding) និងការគ្រប់គ្រងការអនុវត្ត។
២. អនុវត្តគំរូដោះស្រាយបញ្ហា
អនុវត្តតាមផែនការដែលមានរចនាសម្ព័ន្ធ ដើម្បីអនុវត្តគោលការណ៍គ Lean។ នេះគឺជាពីរដែលត្រូវបានគេប្រើជាទូទៅ គឺ៖
- វដ្ដ ផែនការ ធ្វើ សិក្សា សកម្មភាព (Plan Do Study Act – PDSA)
- កំណត់ វាស់វែង វិភាគ កែលម្អ គ្រប់គ្រង (Define Measure Analyze Improve Control – DMAIC)
វដ្ដ ផែនការ ធ្វើ សិក្សា សកម្មភាព (Plan Do Study Act – PDSA) – វិធីសាស្រ្តនេះ ពិនិត្យមើលដំណើរការបច្ចុប្បន្នដូចដែលវាឆ្លុះបញ្ចាំងពីខ្លួនវាបន្ថែមទៀត ធ្វើការកែប្រែ និងធ្វើវដ្តនេះឡើងវិញម្តងទៀត។
ផែនការ (Plan)៖
- ស្វែងរកបញ្ហា និងវាយតម្លៃអ្វីដែលត្រូវផ្លាស់ប្តូរ
- គូសបញ្ជាក់គោលដៅ និងគោលបំណង និងយុទ្ធសាស្រ្តសម្រាប់ធ្វើឱ្យការផ្លាស់ប្តូរកើតឡើង
- កំណត់ថាលទ្ធផលណាមួយនឹងមានន័យថាជោគជ័យ
- ប្រមូលផ្តុំក្រុមអ្នកលេង (a Team of Key Players) សំខាន់ៗ
- បង្កើតផែនការសកម្មភាព
ធ្វើ (Do)៖
- ចាប់ផ្តើមផែនការសកម្មភាព និងប្រមូលទិន្នន័យ
រៀបចំឯកសារការសង្កេត និងបញ្ហាផ្សេងៗ
បង្កើតធនធាន និងឧបករណ៍ត្រឹមត្រូវ ដែលត្រូវការសម្រាប់ការផ្លាស់ប្តូរ
សិក្សា (Study)៖
- ឆ្លុះបញ្ចាំងលើទិន្នន័យដែលប្រមូលបាន ក្នុងការរកមើលនិន្នាការ
វាយតម្លៃថាតើផែនការនេះដំណើរការឬអត់
ទទួលស្គាល់ផលប៉ះពាល់ដែលមិនចង់បាន
កំណត់ការកកស្ទះ និងស្វែងរកមធ្យោបាយផ្សេងៗដើម្បីយកវាចេញ
សកម្មភាព (Act)៖
- សន្និដ្ឋានថាតើផែនការបានដំណើរការឬអត់
ប្រសិនបើផែនការជោគជ័យ ធ្វើស្តង់ដារដំណើរការថ្មី ហើយពិចារណាពង្រីកវាទៅសមត្ថភាពផ្សេងទៀត
ប្រសិនបើផែនការត្រូវការផ្លាស់ប្តូរ សូមត្រឡប់ទៅដំណាក់កាលទីមួយ ហើយធ្វើការកែតម្រូវ ឬ កែទម្រង់
សូមពិនិត្យមើលដំណើរការឡើងវិញនៅពេលក្រោយ ដើម្បីធ្វើការកែលម្អបន្ថែមទៀត
កំណត់ វាស់វែង វិភាគ កែលម្អ គ្រប់គ្រង (Define Measure Analyze Improve Control – DMAIC) គឺជាយុទ្ធសាស្រ្តមួយផ្សេងទៀតដែលជាផ្នែកមួយនៃគំនិតផ្តួចផ្តើម Six Sigma ប៉ុន្តែត្រូវបានគេប្រើជាញឹកញាប់នៅក្នុងវិធីសាស្រ្ត Lean ។ ដំណាក់កាលទាំង ៥ របស់វារួមមាន៖
កំណត់ (Define)៖
- កំណត់បញ្ហាដែលត្រូវដោះស្រាយ ក៏ដូចជាអតិថិជន និងអ្វីដែលពួកគេរំពឹងទុក
កំណត់ការឈប់ ចាប់ផ្តើម និងវិសាលភាពនៃដំណើរការ
បង្កើតផែនទីនៃរំហូរដំណើរការជាមួយនឹងធាតុចូល និងលទ្ធផលទាំងអស់
វាស់វែង (Measure)៖
- ស្វែងរករង្វាស់រសម្រាប់វាស់វឌ្ឍនភាព
ប្រមូលទិន្នន័យដែលពាក់ព័ន្ធ ដើម្បីបង្ហាញពីរបៀបដែលវឌ្ឍនភាពកំពុងដំណើរការ និងបង្ហាញពីភាពខ្វះខាត
វិភាគ (Analyse)៖
- រកឲ្យឃើញភាពខុសគ្នារវាងការអនុវត្តបច្ចុប្បន្ន និងគោលដៅ
កំណត់បញ្ហាដែលអាចកើតមាន និងឱកាសសម្រាប់ការកែលម្អ
ស្វែងរកមូលហេតុនៃបញ្ហា
កែលម្អ (Improve)៖
- ស្វែងរកវិធីដើម្បីកំណត់រចនាសម្ព័ន្ធដំណើរការឡើងវិញ ដើម្បីដោះស្រាយបញ្ហា និងស្វែងរកវិធីបង្ការ
សាកល្បង និងអនុវត្តផែនការសម្រាប់ដំណោះស្រាយ
គ្រប់គ្រង (Control)៖
- ចងក្រងឯកសារដំណោះស្រាយ
បង្កើតប្រព័ន្ធមួយ ដើម្បីត្រួតពិនិត្យដំណើរការដែលបានធ្វើបច្ចុប្បន្នភាព និងរក្សាវាឱ្យដំណើរការ
ពិចារណាក្នុងការជួលអ្នកប្រឹក្សា Lean HR (Consider hiring a lean HR consultant)
ការអនុវត្តគំនិតផ្តួចផ្តើម Lean នៅក្នុងនាយកដ្ឋានរបស់អ្នក អាចមានភាពស្មុគស្មាញ។ នោះហើយជាមូលហេតុដែលអ្នកអាចទទួលបានអត្ថប្រយោជន៍ពីការជួលអ្នកប្រឹក្សាដែលអាចមើលការខុសត្រូវ ឬ ជួយអ្នកបង្កើតផែនការ។
អ្នកប្រឹក្សាបែបនេះ អាចជួយណែនាំការផ្លាស់ប្តូរ Lean នៅក្នុងមុខងារធនធានមនុស្សនៃអង្គភាពរបស់អ្នក និងជួយបុគ្គលិកធនធានមនុស្សរបស់អ្នកក្នុងការអភិវឌ្ឍអាកប្បកិរិយា និងសមត្ថភាពដែលចាំបាច់ ដើម្បីរុករកបរិយាកាស Lean ។
ផលប៉ះពាល់
ការផ្តល់គុណតម្លៃ គឺមានសារៈសំខាន់ជាងពេលណាទាំងអស់នៅក្នុងទីផ្សារប្រកួតប្រជែងនាពេលបច្ចុប្បន្ននេះ ហើយការជំរុញវិធីសាស្រ្ត Lean HR នៅក្នុងស្ថាប័នរបស់អ្នក អាចជួយអ្នកធ្វើកិច្ចការនេះ។ វាពិតជាការខិតខំប្រឹងប្រែងដ៏លំបាកដែលទាមទារការប្តេជ្ញាចិត្ត ពេលវេលា និងធនធាន។ ទោះជាយ៉ាងណាក៏ដោយ ការធ្វើឱ្យដំណើរការធនធានមនុស្សសំខាន់ៗរបស់អ្នកកាន់តែសាមញ្ញ និងមានប្រសិទ្ធភាពជាងនេះ គឺសមនឹងការខិតខំប្រឹងប្រែង។
ទោះបីជាអ្នកគ្រប់គ្រងជាន់ខ្ពស់ មិនទាន់បានអនុវត្តគោលការណ៍ Lean ក៏ដោយ ក៏ផ្នែកធនធានមនុស្សអាចដឹកនាំផ្លូវធ្វើជាគំរូសម្រាប់អង្គភាពទាំងមូល។
អត្ថបទទាក់ទង
បទពិពណ៍នាការងារដៃគូអាជីវកម្មធនធានមនុស្ស (HRBP)៖ រឿងសំខាន់ៗដែលអ្នកចាំបាច់ត្រូវដឹង