កត្តាសំខាន់ៗចំនួន ១១ ដែលអាចធ្វើឱ្យបរិយាកាសនៅកន្លែងការងាររីករាយ
តើអ្វីទៅដែលធ្វើឱ្យមនុស្សរីករាយនៅកន្លែងធ្វើការ? នេះជាសំណួរមួយដែលនិយោជកជាច្រើនព្យាយាមរកចម្លើយ ដើម្បីចង់ឱ្យក្រុមការងាររបស់គេធ្វើការបានល្អបំផុត។ ការសិក្សាថ្មីមួយរបស់នាយកដ្ឋានពាណិជ្ជ ច្នៃប្រតិដ្ឋ និងជំនាញ រកឃើញថា ភាពរីករាយ និងសុខមាលភាពរបស់បុគ្គលិកក្នុងស្ថាប័នការងារមួយមានទំនាក់ទំនងយ៉ាងខ្លាំងទៅនឹងផលិតភាព គុណភាព និងផលចំណេញរបស់ក្រុមហ៊ុន។ មានកត្តាសំខាន់ចំនួន១១ ដែលអាចធ្វើឱ្យបរិយាកាសនៅកន្លែងការងាររីករាយ និងជួយឱ្យបុគ្គលិកទាំងអស់សប្បាយចិត្តនឹងធ្វើការ៖
១. ស្វ័យភាព
ចំណុចនេះ មានន័យថា បុគ្គលិកទាំងអស់ អាចមានសិទ្ធិសម្រេចចិត្តខ្លះៗអំពីរបៀបធ្វើការរបស់គេ។ ទោះជាយ៉ាងណា មិនមែនមានន័យថាជាការបណ្តែតបណ្តោយឱ្យបុគ្គលិកទាំងអស់ធ្វើអ្វីតាមចិត្តនោះទេ។
២. ភាពចម្រុះ
នេះជារសជាតិជីវិត ហើយនៅកន្លែងធ្វើការវិញ មានន័យថាពេលវេលាពីមួយថ្ងៃទៅមួយថ្ងៃ បុគ្គលិកមានភាពចម្រុះនៃទម្ងន់ការងារ និងភារកិច្ចដែលត្រូវធ្វើ គឺមិនមែនជាការងារដដែលៗដូចមនុស្សយន្តនោះទេ។
៣. សារៈសំខាន់
បុគ្គលិកត្រូវការមានអារម្មណ៍ថាការងារគេមានសារៈសំខាន់ចំពោះក្រុមហ៊ុន និងសង្គមដែលគេរស់នៅ។ នេះជាចំណុចងាយយល់ ព្រោះថាក្រុមហ៊ុននឹងមិនមានការងារឱ្យបុគ្គលិកធ្វើបើមិនមានអ្វីពាក់ព័ន្ធនឹងសង្គម។
៤. ភាពច្បាស់លាស់
បុគ្គលិកដែលដឹងច្បាស់ថាថ្នាក់ដឹកនាំក្រុមហ៊ុនចង់ឱ្យគេធ្វើកិច្ចការអ្វីខ្លះ ធ្វើការបានល្អជាងបុគ្គលិកដែលមិនដឹងតួនាទីខ្លួនឯង។ តើអ្នកអាចវាយតម្លៃការងារបានដូចម្តេចបើមិនមានការរំពឹងទុកអំពីការងារនោះ។
៥. ការគាំទ្រ
ស្របពេលដែលបុគ្គលិកចង់បានភាពស្វ័យតក្នុងការងារ គេក៏ចង់បានការគាំទ្រពីថ្នាក់ដឹកនាំដែរ។ ក្នុងនាមជាប្រធានក្រុមហ៊ុន អ្នកត្រូវតែបង្កើតប្រព័ន្ធគាំទ្រឱ្យបានគ្រប់គ្រាន់ដល់បុគ្គលិកទាំងអស់ និងបង្កើតបរិស្ថានមួយដែលបុគ្គលិកទាំងអស់គាំទ្រគ្នាទៅវិញទៅមក។
៦. ភាពស្និទ្ធស្នាល
ជាការចាំបាច់ណាស់ដែលបុគ្គលិកមិនត្រូវស្ថិតនៅក្នុងភាពឯកោ។ គេគួរតែមានទំនាក់ទំនងយ៉ាងវិជ្ជមានជាមួយនឹងថ្នាក់ដឹកនាំ សហការី និងអតិថិជន។
៧. ឱកាស
បុគ្គលិកត្រូវការឱកាសដើម្បីអភិវឌ្ឍខ្លួននិងជំនាញ។ ទម្ងន់និងភាពចម្រុះនៃការងារជាមធ្យោបាយមួយនៃការរៀនសូត្រ ប៉ុន្តែវគ្គបណ្តុះបណ្តាល ឬសិក្ខាសាលាកាន់តែធ្វើឱ្យបុគ្គលិកពេញចិត្តយល់ដឹងបន្ថែមទៀត។
៨. សុវត្ថិភាពផ្ទាល់ខ្លួន
ចំណុចនេះមិនមានអ្វីគួរឱ្យសង្ស័យទេ ព្រោះបើមនុស្សម្នាក់យល់ថាគេគ្មានសុវត្ថិភាព គេនឹងមិនអាចធ្វើការបានល្អឡើយ។ អារម្មណ៍គំរាមកំហែង ឬភ័យខ្លាចនឹងបំផ្លាញការងារទាំងអស់ដែលគេធ្វើ។ ប្រធានក្រុមហ៊ុនត្រូវតែគិតគូឱ្យបានដិតដល់។
៩. អនាគត
មនុស្សស្ទើរតែគ្រប់គ្នាដឹងថាក្រុមហ៊ុនជាច្រើនត្រូវតែបត់បែនដើម្បីបន្តជីវិតពីមួយថ្ងៃទៅមួយថ្ងៃ ដូច្នេះគេមិនអាចធានាសន្តិសុខការងារបានជានិរន្តរឡើយ។ ប៉ុន្តែប្រសិនបើបុគ្គលិកមានអារម្មណ៍ថាគេមានអនាគតក្នុងការងារ ឬជំនាញនេះ គេនឹងធ្វើការយ៉ាងពេញចិត្ត។
១០. យុត្តិធម៌
បុគ្គលិកត្រូវត្រូវការមានអារម្មណ៍ថាមនុស្សគ្រប់គ្នាទទួលបានយុត្តិធម៌ទាំងក្នុងទម្ងន់ការងារ និងផលប្រយោជន៍។ ចំណុចនេះមានន័យថាការគោរគ្នាត្រូវតែមានជាចាំបាច់ ហើយការបំពាបំពានត្រូវតែលុបបំបាត់។
១១. ផលប្រយោជន៍
ច្បាស់ណាស់ថាបុគ្គលិកត្រូវតែទទួលបានប្រាក់ខែទៅតាមកម្លាំងការងារដែលគេធ្វើ។ បុគ្គលិកត្រូវតែអាចមានជីវភាពសមរម្យតាមរយៈការងាររបស់គេ ហើយក្នុងកម្រិតនៃមុខតំណែងដូចគ្នា ផលប្រយោជន៍មិនត្រូវខុសគ្នាច្រើនពេកឡើយដែលជាហេតុនាំឱ្យកើតការច្រណែនគ្នា។
សម្រួលពី៖ Virgin Group
អត្ថបទទាក់ទង
មធ្យោបាយសាមញ្ញៗ ៧ យ៉ាង ដើម្បីកាត់បន្ថយស្ត្រេសនៅកន្លែងធ្វើការ