គុណសម្បត្ដិ ២ យ៉ាងដែលចាំបាច់សម្រាប់អ្នកទំនាក់ទំនងសាធារណៈដ៏ល្អម្នាក់នៅក្នុងយុគសម័យឌីជីថល
ការងារទំនាក់ទំនងសាធារណៈ ឬហៅកាត់ជាភាសាអង់គ្លេសថា PR (Public Relations) គឺជាការងារមួយដែលទាមទារនូវជំនាញនិយាយ និងការទំនាក់ទំនងល្អ ដើម្បីរកវិធីសាស្ត្រទាក់ទាញអតិថិជន និងសាធារណជនឲ្យស្គាល់ស្លាកយីហោរបស់ក្រុមហ៊ុន ឬផលិតផលរបស់ខ្លួន។
តើត្រូវមានគុណលក្ខណៈអ្វីខ្លះសម្រាប់បុគ្គសាធារណៈដែលត្រូវមកផ្សាយផលិតផល ឬសេវាកម្មឲ្យក្រុមហ៊ុនអ្នក? ពិតណាស់ បណ្ដាញសង្គម បាននឹងកំពុងផ្លាស់ប្តូរឧស្សាហកម្មទំនាក់ទំនងសាធារណៈយ៉ាងខ្លាំង។ កន្លងមក បណ្តាអ្នកគ្រប់គ្រងផ្នែកទំនាក់ទំនងសាធារណៈនៃក្រុមហ៊ុនពាណិជ្ជកម្មនានា និយមផ្ញើអ៊ីមែលទៅហៅអ្នកសារព័ត៌មាន ទស្សនាវដ្តី មកចូលរួមញាំកាហ្វេ និងចែកអាំងប៉ាវ ដើម្បីជាថ្នូរនឹងសន្លឹកព័ត៌មានដែលសរសេរសរសើរផលិតផល និងសេវាកម្មខ្លួន។ ប៉ុន្តែ ឥឡូវនេះ ការបញ្ចេញមតិ (Comment) ពីអតិថិជន ទើបជា PR ដ៏មានប្រសិទ្ធិភាពអាចបណ្តាលឱ្យក្រុមហ៊ុននីមួយៗទទួលបានលុយ ឬខាតបង់រាប់លានដុល្លារក្នុងរយៈពេលត្រឹម ២-៣នាទី។
គុណសម្បត្ដិ ២ យ៉ាងដែលចាំបាច់សម្រាប់អ្នកទំនាក់ទំនងសាធារណៈដ៏ល្អម្នាក់នៅក្នុងយុគសម័យឌីជីថល៖
១. ពួកគេមានចំណេះដឹង
កុំរើសយកមនុស្សដែលល្បីលើហ្វេសប៊ុក ឬ អ៊ីនស្តាក្រាម ដែលទន្ទេញដូចសេក ច្រេកៗដូចកញ្ចែ តែមិនមានគុណតម្លៃពិតនៃចំណេះជំនាញក្នុងការផ្សព្វផ្សាយ។ មនុស្សជាច្រើនមកហើយ បានខកចិត្តដោយការស៊ីញ៉ែកុងត្រាខុស ដែលពេញមួយឆ្នាំ សត្វសេកមិនអាចនាំសារបានឡើយ បានត្រឹមពិរោះ មានគេមើលច្រើន តែមិនមានគេចង់ទិញប្រើ ឬមិនមានគេឲ្យតម្លៃម៉ាកសញ្ញានោះ។ អ្នក PR ខ្លាំង ត្រូវតែពូកែ និងមានការចាប់អារម្មណ៍ខ្ពស់ តាមដានលឿនពីអ្វីៗដែលកំពុងកើតឡើងនៅក្នុងឧស្សាហកម្មរបស់ផលិតផលនោះ មិនថាបច្ចេកវិទ្យា ទំនោរយុវវ័យ ជាពិសេសនារីៗដែលជាអ្នកប្រើប្រាស់ ។ល។
ពួកគេមានជំនាញទំនាក់ទំនងដែលអាចរក្សាបច្ចុប្បន្នភាពអំពីព្រឹត្តិការណ៍បច្ចុប្បន្ន និងនិន្នាការបច្ចុប្បន្នដែលអាចជះឥទ្ធិពលដល់ឧស្សាហកម្មដែលពួកគេធ្វើការផ្សព្វផ្សាយឱ្យ។
សម្រាប់ហេតុផលនេះ អ្នកគួរតែស្វែងរកអ្នកដែលមានបទពិសោធន៍ ដោយប្រើឧបករណ៍ស្រាវជ្រាវសង្គមលឿន ហើយដែលមានគេគោរពជាជាងគេ Likes ។
២. រហ័សរហួន បត់បែន ច្នៃប្រតិដ្ឋ
ដោយសារតែមានរឿងជាច្រើនកើតឡើងនៅលើបណ្តាញសង្គមរៀងរាល់ ២-៣នាទី ដូច្នេះ មាតិកាដដែលៗ មិនមែនជាអ្វីដែលអាចវាយយកទីផ្សារបានឡើ់យ។ អ្នកផ្សាយឡានទំនើបមួយជាមួយមនុស្សដែលសង្គមជាន់ខ្ពស់មិនឲ្យតម្លៃ តើអ្នកលក់ជាមួយអ្នកណា? អ្នកគ្រប់គ្រងការិយាល័យទីផ្សារ នឹងមានវិបត្តិយីហោដ៏ធំ ប្រសិនពួកគេខ្ជីខ្ជាក្នុងការរើសអ្នកតំណាង ឬបុគ្គលសាធារណៈរបស់ខ្លួន។
មនុស្សសាធារណៈម្នាក់ ចាំបាច់ត្រូវតែជាអ្នកស្រាវជ្រាវដ៏ល្អ ដើម្បីទំនាក់ទំនងឲ្យបានត្រឹមត្រូវ និងមានសិទ្ធិអំណាចលើប្រធានបទមួយច្បាស់លាស់ និងមិនចេះតែទន្ទេញ នោះទេ។ មិនថាពួកគេស្គម ធាត់ ស ខ្មៅ ការស្រាវជ្រាវ និងជំនាញវិភាគ ជាចំណេះដ៏រឹងមាំ ដែលសម្គាល់អ្នកទំនាក់ទំនងសាធារណៈដ៏ខ្លាំងម្នាក់ជាងអ្នកណាៗទាំងអស់។
ពួកគេមិនត្រឹមតែច្បាស់ប៉ុននោះទេ ប៉ុន្តែអាចផ្លាស់ប្តូរយុទ្ធសាស្ត្រ ១៨០ ដឺក្រេ នៅពេលមានហានីភ័យកើតឡើង។ ការមានប្រតិកម្មរហ័សរហួន គឺជាគុណសម្បត្ដិដ៏សំខាន់បំផុតមួយ ដែលអ្នកជំនាញផ្នែកទំនាក់ទំនងសាធារណៈដែលស្ថិតក្រោមសម្ពាធ អាចធ្វើឲ្យយីហោមួយនៅតែខ្ពស់បាន។ ពួកគេមិនត្រឹមតែអាចនិយាយដោយមិនមើលនោះទេ តែថែមទំាងអាចសរសេរខ្លីៗ ងាយយល់ ចាក់ដោត នៅលើបណ្តាញនានាផងដែរ។ ក្រុមហ៊ុនជាច្រើន បានរើសយកតារាដែលមានរូបរាងស្អាត ប៉ុន្តែនាងផុសរូបជាមួយចំណងជើង (Caption) ដែលគ្មានខ្លឹមសារ ហើយរូបនោះ បង្អួតតែរាងកាយនាង មិនមែនគុណតម្លៃនៃផលិតផលរបស់អ្នកឡើយ។ PR ជាវិជ្ជាជីវៈមួយដែលទាមទារជានិច្ចនូវគំនិតថ្មីៗ និងភាពច្នៃប្រតិដ្ឋដែលជាជំនាញដ៏សំខាន់ ដើម្បីនាំមនុស្សគ្រប់គ្នាឲ្យព្រមជឿតាម។
អត្ថបទទាក់ទង