គុណសម្បត្តិអ្នកគ្រប់គ្រងចំនួន ៦ ដែលអ្នកគ្រប់គ្រងថ្នាក់កំពូល ឬអ្នកវិនិយោគតែងពិនិត្យមើល
អ្នកគ្រប់គ្រង គឺជាអ្នកអនុវត្តការងារនៅអង្គភាពមួយ ឬអង្គការចាត់តាំងមួយ ដោយរៀបចំជាប្រព័ន្ធរបស់មនុស្ស ដើម្បីសម្រេចគោលដៅជាក់លាក់មួយ។ ទោះបីជាធនធានមនុស្សអាស្រ័យទំហំប្រាក់ខែ តែការគ្រប់គ្រង ជាអ្វីមួយដែលម្ចាស់អាជីវកម្ម អាចជោគជ័យ ឬក៏បរាជ័យយ៉ាងងាយ។ ការបង្កើតសំណុំនៃគោលបំណង (Directions-KPI) ដែលអាចវាស់វែងបាន សម្រាប់និយោជិតម្នាក់ៗ គ្រាន់តែជាផ្នែកមួយនៃការគ្រប់គ្រងការអនុវត្តប៉ុណ្ណោះ ប៉ុន្តែការតាមដាន និងវាយតម្លៃ ជួយបុគ្គលិកទម្លុះឧបសគ្គ ត្រូវការអ្នកគ្រប់គ្រងដ៏មានសមត្ថភាព ពិសេសនៅថ្នាក់កណ្តាល (Middle Management ) ដែលជាទូទៅនៅគ្រប់គ្រងផ្នែកផលិតកម្មសេវាកម្ម។
សារៈសំខាន់នៃការគ្រប់គ្រង
ការគ្រប់គ្រង អាចជួយជំរុញបុគ្គលិកស្គាល់ពីការរំពឹងទុកនៃក្រុម រើសយកសកម្មភាពសមហេតុផល និងច្នៃប្រតិដ្ឋ ផ្ដោតលើគោលដៅដែលពួកគេអាចយល់បាន និងច្បាស់លាស់ថាកំពុងឆ្ពោះទៅទីណា ការនេះអាចជំរុញឲ្យប្រសើរឡើងអំពីដំណើរការអាជីវកម្មគ្រប់ទំហំ។ អ្នកគ្រប់គ្រងដែលល្អគឺ៖
១. ពូកែលើកទឹកចិត្ត
ការចូលរួមរបស់និយោជិកអាចកើនឡើងទ្វេដង នៅពេលដែលទេពកោសល្យផ្នែកគ្រប់គ្រងពូកែលើកទឹកចិត្ត ។ ប្រាក់ចំណូលជាមធ្យម ១៤៧ ភាគរយក្នុងក្រុមហ៊ុនដែលមានសន្ទុះលើកទឹកចិត្តល្អ ធៀបនឹងក្រុមហ៊ុនធម្មតា ។ គំនិតដ៏អស្ចារ្យសម្រាប់ការកោតសរសើរបុគ្គលិកនឹងផ្លាស់ប្ដូរបរិយាកាសទាំងមូលនៃក្រុមហ៊ុន ធ្វើឲ្យគ្រប់គ្នាយល់ថាគេមានសារៈសំខាន់ចំពោះក្រុមហ៊ុនក្លាយជាអ្នកគ្រប់គ្រងលើតួនាទីនីមួយៗ។
២. ទទួលខុសត្រូវខ្ពស់
អ្នកគ្រប់គ្រង តម្រូវឲ្យរៀនទទួលយកទំនួលខុសត្រូវ បែងចែកគុណសម្បត្តិ ក៏ដូចជាមានឆន្ទៈក្នុងការប្រើមនុស្សឲ្យចំសមត្ថភាព និងចេះទទួលស្គាល់កូនចៅ ទទួលយកភាពខ្លាំង និងខ្សោយ។ មិនមែនចង្អុលតែកំហុស រំឮកដដែលៗ ហើយបំបាត់គុណតម្លៃគ្នាចោលទេ។ ភាគច្រើនសេវាកម្ម ឬផលិតផលមួយ សង្វាក់ការងារមួយ ល្អ ឬមិនល្អ គេវាយតម្លៃអ្នកគ្រប់គ្រង។
៣. ចេះគ្រប់គ្រងស្ថានការណ៍
មិនថាបរិយាកាសអាក្រក់ប៉ុនណា អ្នកគ្រប់គ្រងល្អ អាចគ្រប់គ្រងពាក្យចចាមអារាមបានព្រោះគេទទួលបានទំនុកចិត្តពីបុគ្គលិក និងក្រុមទាំងមូល។ គេអាចគ្រប់គ្រងស្ថានការណ៍នានាបានយ៉ាងល្អ ក្នុងសមត្ថិកិច្ចក្រុមការងាររបស់ខ្លួន។
៤. ហ៊ានដោះស្រាយបញ្ហា
កុំគ្រាន់តែជាអ្នកសម្របសម្រួល! អ្នកត្រូវមានបទពិសោធន៍ ស្មានដឹងពីឥរិយាបថណាដែលមានសារៈសំខាន់ សម្រាប់ទទួលបានជោគជ័យរវាងក្រុម ដោះស្រាយទំនាស់ បង្កើនការចេះយោគយល់ខ្ពស់ជាវប្បធម៌ បង្កើតកិច្ចសហការគ្នាឆ្លងកាត់គ្រប់ឧបករណ៍ អ៊ីមែល កំណត់ប្រតិទិននិងផ្សេងៗទៀត។ មានការសន្ទនាដ៏ស្វិតស្វាញរុករកឱកាសដោះស្រាយបង្កើតទំនាក់ទំនងឲ្យកាន់តែល្អប្រសើរ ពីពេលមួយទៅពេលមួយ។
៥. បំបាត់រាល់ការភ័យព្រួយ
កន្លែងល្អមួយ គឺគ្រប់គ្នាអាចការទុកចិត្តបាន ខណៈដែលកន្លែងដែលភាពភ័យខ្លាចលែងមាន។ និយោជិករត់ចេញពីកន្លែងជាច្រើនដែលគ្រប់គ្រងដោយបង្កើតបរិយាកាសគម្រាម បំភិតបំភ័យឲ្យខ្លាចជាជាងស្រលាញ់។ កន្លែងដែលអ្នកគ្រប់គ្រងប្រើអំណាចនៃតំណែងរបស់ពួកគេដើម្បីគ្រប់គ្រងក្រុម។ ការធ្វើជាអ្នកគ្រប់គ្រងបែបនេះបានតែមួយរយៈ ដោយសារតែគ្មានអាជីវកម្មណាអាចធ្វើឲ្យសមាជិកក្រុមបាត់បង់សមាជិកបន្ទរបន្ទាប់ទុកយើងម្នាក់សោយរាជ្យទេ។
៦. ចេះផ្ដល់ព័ត៌មានជាគន្លឹះ
អ្នកគ្រប់គ្រងល្អ តែងបង្កើតនូវវិធីសាស្ត្រថ្មីៗមិនធុញទ្រាន់ សម្រាប់ផ្ដល់ដំណឹងទាន់ពេលវេលា ចេះពន្យល់ និងជំរុញឲ្យបុគ្គលិកមានភាពសកម្មក្នុងតួនាទី។ មិនថាប្រជុំ ឆាតតាមបណ្ដាញសង្គម សរសេរកំណាព្យ គូរគំនូរ ឆ្លើយសំណួរយករង្វាន់ ការប្រជែងផលិតរឿងខ្លី ឬអ្វីក្តី ឲ្យតែអាចទាញឲ្យមានការយកចិត្តទុកដាក់ក្នុងចំណោមបុគ្គលិកឲ្យដឹងអំពីការវិវឌ្ឍន៍ចុងក្រោយបំផុតក្នុងស្ថាប័នខ្លួន ការខ្វះចន្លោះព័ត៌មាន បង្កើតការមន្ទិលនឹងលែងមាន ដែលនាំឲ្យគ្រប់គ្នាធ្វើការមិនចេះហត់នឿយពេញដោយសន្ទុះ។
អត្ថបទទាក់ទង
យុទ្ធសាស្រ្តសំខាន់ៗចំនួន ៥ ដើម្បីកែសម្រួលការគ្រប់គ្រង និងចាប់ផ្តើមភាពជាអ្នកដឹកនាំពិតប្រាកដ