តើធ្វើដូចម្តេចដើម្បីបំផុសគំនិតច្នៃប្រតិដ្ឋក្នុងការលក់?
យោងតាមវចនានុក្រមសម្តេចព្រះសង្ឃរាជ ជួន ណាត៖
គំនិត ( ន. ) ការគិត, យោបល់ : គំនិតល្អ, គំនិតអាក្រក់, គំនិតស្តាំ, គំនិតឆ្វេង ។ ទាល់គំនិត គឺទាល់ផ្លូវគិត, អស់ផ្លូវគិត ។ ព. ទ. បុ. ប្រាំបួនទាល់ ដប់ទាល់ កុំឲ្យតែទាល់គំនិត ។
- (សតិ) ការយល់ឃើញ ការគិត ឬរូបភាពនៅក្នុងសតិ (mind) របស់មនុស្ស ឧ. តើអ្នកមានគំនិតថាគាត់មានរូបរាងដូចម្ដេច?
- សំណើឬផែនការសម្រាប់ធ្វើអ្វីមួយ ឧ. ខ្ញុំមានគំនិតបន្តការសិក្សានៅបរទេស។
- ជំនឿ ឬ ទស្សនៈ ឧ. យើងមានគំនិតខុសគ្នាស្រឡះអំពីការដាក់ពិន័យចំពោះកុមារ។
- បំណងឬហេតុផលក្នុងការធ្វើអ្វីមួយ, ឧ. គំនិតរួមនៃការផ្សាយពាណិជ្ជកម្ម គឺធ្វើឱ្យមនុស្សទិញផលិតផលឬសេវា។ idea, idé
ច្នៃ ( កិ. ) ក្រឡឹង, ធ្វើឲ្យមានពន្លឺដោយគ្រឿងប្រដាប់សម្រាប់ប្រកបការនោះ : ច្នៃត្បូង ។ ព. ប្រ. លៃលកឲ្យបានស្រួល, ឲ្យបានល្អឡើង, កែសម្រួល : ច្នៃពាក្យ, ច្នៃសេចក្ដី, ច្នៃដំណើររឿង ។ គុ. ដែលគេច្នៃរួចហើយ : ត្បូងច្នៃ ។ ម. ព. ចរណៃ ផង ។
ប្រតិដ្ឋ (ប្រតិដ បា.; សំ.) ( កិ. ) (បតិដ្ឋ; ប្រតិឞ្ឋ “ឋិតនៅនឹង, តាំងនៅស៊ប់, តាំងនៅជាប់លាប់; ឈរស៊ប់,…”) ខ្មែរប្រើពាក្យនេះសំដៅសេចក្ដីថា បង្កើតឲ្យមានឡើងតាមយោបល់របស់ខ្លួន ដោយប្រដូចទៅនឹងនេះនឹងនោះខុសសោះក៏មាន ត្រូវដែរក៏មាន : កុំអាលជឿពេក ព្រោះអ្នកនិយាយចេះតែប្រតិដ្ឋថាៗទៅទេ ។ ប្រើជា គុ. ក៏បាន : រឿងប្រតិដ្ឋ, ពាក្យប្រតិដ្ឋ រឿងឬពាក្យដែលគេប្រតិដ្ឋឲ្យមានឡើង : សាស្ត្រាល្បែងថ្លែងរឿងក្រៅពីជាតកមែនទែន, ដូចជារឿងលក្សណវង្ស, រឿងស័ង្ខសិល្ប៍ជ័យ, រឿងសព្វសិទ្ធ, រឿងជិនវង្ស … សុទ្ធតែជារឿងប្រតិដ្ឋ ដូចគ្នានឹងរឿងប្រលោមលោកដទៃទៀត ដែលជារឿងប្រតិដ្ឋនោះដែរ ។ ពាក្យថា រូបយាយចាស់រវៃអំបោះនៅក្នុងវង់ព្រះចន្ទ្រ ជាសម្ដីប្រតិដ្ឋប្រាប់ក្មេងតូចៗដែលវាសួរ, ឯតាមការណ៍ពិត គឺជារូបទន្សាយ (ពោធិសត្វ) ដែលមានចែងក្នុងគម្ពីរជាតក (ខាងពុទ្ធនិយម) ។ល។ តាមទម្លាប់និយាយថា ប្រឌិត ឬធ្លាប់សរសេរ ប្រឌិដ្ឋ ក៏មាន, គួរសរសេរ ប្រតិដ្ឋ វិញត្រឹមត្រង់តាម សំ. និង បា. លាយចម្រុះគ្នា, ត្រូវការអាន ប្រដិត, ឬថា ប្រឌិត តាមទម្លាប់ក៏សឹងតែបាន, ដូចជាសរសេរ អតិត ឬអតីត ធ្លាប់អានថា អឌិត នោះដែរ ដ្បិតការអានខុសពីសរសេរនេះ រាប់ថាជា អញ្ញត្រសព្ទ ក្នុងអក្សរសាស្ត្រ ដូចជា អញ, អ្នក, នេះ, នោះ អានថា អាញ់, នាក់, និះ, នុះ… ដូច្នោះដែរ ។ល។
ចូលមកក្នុងរឿងការបំផុសគំនិតច្នៃប្រតិដ្ឋក្នុងការលក់វិញ អតិថិជនប្រៀបបានដូចជាប្រេងឥន្ធនៈដែលអាចឲ្យរថយន្តរបស់អ្នកទៅមុខរួច។ មិនថាអ្នកមានមនុស្សនៅក្នុងក្រុមហ៊ុន សុទ្ធតែអ្នកពូកែខាងគ្រប់គ្រង ខាងហិរញ្ញវត្ថុ ឬខាងរៀបចំគម្រោងយ៉ាងណាក៏ដោយ ប្រសិនបើអ្នកលក់ផលិតផល ឬសេវាកម្មមិនចេញនោះទេ អ្នកនឹងគ្មានលុយសម្រាប់បើកឲ្យបុគ្គលិក ហើយបន្តមកទៀត គឺត្រូវបិទទ្វា។
តើអ្នកកំពុងតែលក់ដោយប្រើគំនិតច្នៃប្រតិដ្ឋដែលអ្នកមានឬយ៉ាងណា? បើអ្នកកាន់តែមានសេចក្ដីប្រាថ្នាក្នុងការសម្រេចគោលដៅជាក់លាក់ និងចំៗខ្លាំងប៉ុណ្ណា អ្នកក៏កាន់តែមានភាពច្នៃប្រតិដ្ឋក្នុងការស្វែងរកវិធីសម្រេចគោលដៅកាន់តែខ្លាំងឡើងប៉ុណ្ណឹងដែរ។ បើអ្នកកាន់តែមានភាពពុះពារក្នុងការដោះស្រាយបញ្ហាសំខាន់ខ្លាំងប៉ុណ្ណា អ្នកក៏កាន់តែមានសមត្ថភាពក្នុងការស្វែងរកវិធីដោះស្រាយបញ្ហាដោយឡែកៗពីគ្នាកាន់តែច្រើនប៉ុណ្ណោះ។ ហើយបើសំណួរដែលអ្នកសួរមកលើខ្លួនឯង ឬសួរទៅកាន់អ្នកដទៃមានភាពមុះមុតខ្លាំងប៉ុណ្ណា នោះអ្នកក៏កាន់តែមានភាពច្នៃប្រតិដ្ឋក្នុងការគិតរកចម្លើយកាន់តែច្រើនឡើងយ៉ាងហ្នឹងដែរ។ ប៉ុន្តែអ្វីដែលសំខាន់នោះ គឺថាតើអ្នកអាចបំផុសនូវគំនិតច្នៃប្រតិដ្ឋរបស់អ្នកបានយ៉ាងដូចម្ដេចដើម្បីឲ្យការលក់មានប្រសិទ្ធភាព?
ខាងក្រោមនេះ គឺជាវិធីសាស្រ្ត ៣យ៉ាង ដែលនឹងជួយអភិវឌ្ឍ និងបំផុសនូវគំនិតច្នៃប្រតិដ្ឋរបស់អ្នកឲ្យកាន់តែប្រសើរឡើង៖
១. ហ្វឹកហាត់គិតប្រកបដោយភាពច្នៃប្រតិដ្ឋ
ការគិតបែបច្នៃប្រតិដ្ឋ វាមិនមែនជារឿងមួយដែលមនុស្សរាល់គ្នាអាចធ្វើបានទាំងអស់នោះទេ ប្រសិនបើពួកគេមិនមានការហ្វឹកហាត់ អនុវត្តន៍ និងមិនមានភាពអត់ធ្មត់ក្នុងការធ្វើវាទេនោះ ជាពិសេសចំពោះការលក់ ព្រោះវាមានផ្នែកជាច្រើនដែលអាចបង្កើននូវគំនិតច្នៃប្រតិដ្ឋរបស់អ្នកឲ្យកាន់តែមានភាពរស់រវើក។ ជាក់ស្ដែង បើអ្នកកាន់តែក្លាយជាមនុស្សច្នៃប្រតិដ្ឋនៅក្នុងផ្នែកនេះច្រើនប៉ុណ្ណា អ្នកក៏កាន់តែរកប្រាក់បានច្រើនប៉ុណ្ណឹងដែរ។
ចំពោះផ្នែកទី ១ ដែលថា គំនិតច្នៃប្រតិដ្ឋមានភាពសំខាន់នោះ គឺការស្វែងរកអតិថិជន ព្រោះភាពជោគជ័យដំបូងរបស់អ្នកក្នុងការស្វែងរកអតិថិជន វានឹងផ្ដល់ផលយ៉ាងធំធេងដល់ចំណូលរបស់អ្នក ហើយសមត្ថភាពរបស់អ្នកក្នុងការស្វែងរកអតិថិជនឲ្យបានកាន់តែច្រើន និងប្រសើរឡើងជាលំដាប់នោះ គឺវាអាស្រ័យទៅលើរូបារម្មណ៍របស់អ្នកនេះឯង។ រីឯផ្នែកទី ២ ដែលគំនិតច្នៃប្រតិដ្ឋ មានភាពសំខាន់នោះ គឺការស្វែងរកមូលហេតុដើម្បីទាក់ទាញចិត្តឲ្យគេទិញ។ អ្នកត្រូវមានភាពច្នៃប្រតិដ្ឋក្នុងការដាក់សំណួរដើម្បីស្វែងរកឲ្យឃើញថា តើអ្វីគឺជាតម្រូវការរបស់អតិថិជន? ហើយអ្វីជាមូលហេតុដែលធ្វើឲ្យអតិថិជនសម្រេចចិត្តទិញផលិតផល ឬសេវាកម្មនោះ? យ៉ាងណាមិញផ្នែកទាំង ២ នេះ វាគឺជាការដកពិសោធន៍សតិបញ្ញា ភាពវាងវៃ ភាពរហ័សរហួន ការបត់បែន និងថាមពលខួរក្បាលរបស់អ្នកយ៉ាងពិតប្រាកដ។
២. គិតរិះរកវិធីសាស្រ្តប្រើទំនិញបែបថ្មី
គំនិតច្នៃប្រតិដ្ឋរបស់អ្នក គឺជាកត្តាមួយដែលសំខាន់បំផុតក្នុងការរកវិធីសាស្ត្រ និងការប្រើទំនិញថ្មីឲ្យមានប្រសិទ្ធភាព។ អ្នកត្រូវប្រើថាមពលខួរក្បាលដើម្បីគិតរកវិធីសាស្ត្រ និងទិចនិកចំនួនក្នុងការប្រើទំនិញបែបថ្មី ដើម្បីធ្វើឲ្យការលក់ដែលនៅមិនទាន់មាននរណាធ្លាប់លក់ពីមុនមកនោះកើតឡើង។ តួយ៉ាង ការយកកត្តាផ្សំតូចៗនៃការធ្វើធុរកិច្ចមករួមបញ្ចូលគ្នារួមមាន រូបអ្នក ក្រុមហ៊ុនអ្នក អតិថិជន ទំនិញ ឬសេវាកម្ម តម្លៃ ការដឹកជញ្ចូន ការតម្លើង និងកិច្ចការផ្សេងៗ គឺសុទ្ធតែជារឿងមួយដែលស្មុគស្មាញ ដែលអ្នកចាំបាច់ត្រូវតែមានគំនិតច្នៃប្រតិដ្ឋខ្ពស់ក្នុងការដោះស្រាយ និងគ្រប់គ្រងវាឲ្យបានល្អ។
សមត្ថភាពរបស់អ្នកក្នុងការប្រើគំនិតច្នៃប្រតិដ្ឋ ដើម្បីយកឈ្នះលើមតិរិះគន់របស់អ្នកទិញ និងការឆ្លើយតបចំពោះការតវ៉ា គឺជារឿងសំខាន់មួយចំពោះភាពជោគជ័យនៅទឹកចុងក្រោយ ហើយសមត្ថភាពក្នុងការសម្រេចការលក់ និងធ្វើឲ្យអតិថិជនសម្រេចចិត្ត វាគឺជាកត្តាសំខាន់ក្នុងការសន្និដ្ឋានថា អ្នកលក់បានប៉ុណ្ណា ហើយអ្នកនឹងរកប្រាក់បានច្រើនប៉ុណ្ណា។
៣. ត្រូវដឹងថាខ្លួនឯងនិយាយពីអី្វ
ការលក់ប្រកបដោយភាពច្នៃប្រតិដ្ឋ គឺចាប់ផ្ដើមដោយការយល់ដឹងលម្អិតពីទំនិញ ឬសេវាកម្មរបស់អ្នក។ បើអ្នកកាន់តែដឹង និងយល់ច្បាស់ថា តើអ្នកកំពុងតែលក់អ្វីច្រើនប៉ុណ្ណា អ្នកក៏កាន់តែមានភាពច្នៃប្រតិដ្ឋក្នុងការលក់ច្រើនប៉ុណ្ណោះដែរ។ បើអ្នកកាន់តែមានការយល់ដឹងថា “ហេតុអ្វីបានទំនិញរបស់អ្នកល្អជាងទំនិញរបស់គូប្រជែង ឬហេតុអ្វីបានជាទំនិញរបស់អ្នកអន់ជាងដៃគូប្រកួតប្រជែងបាន?” នោះអ្នកនឹងអាចរកទិចនិកដើម្បីពង្រឹង និងអភិវឌ្ឍវាឲ្យកាន់តែរីកចម្រើន ជាពិសេស គឺអាចនិយាយរៀបរាប់ពីគុណភាព និងសារសំខាន់នៃផលិតផលរបស់អ្នកបានយ៉ាងល្អ។
សរុបមកវិញ បើសិនជាអ្នកចង់បំផុសនូវចំណេះដឹង និងគំនិតច្នៃប្រតិដ្ឋដែលមាននៅក្នុងខ្លួនអ្នក អ្នកត្រូវតែចំណាយពេលហ្វឹកហាត់ និងរៀនពីវាជារៀងរាល់ថ្ងៃតាមរយៈការធ្វើការងារ និងការសិក្សារៀនសូត្ររបស់អ្នក។ ដូចនេះចំពោះចំណុចធំៗទាំង ៣ ខាងលើដែលបានលើកឡើងមកនេះ ពួកយើងសង្ឃឹមថាវានឹងជួយអភិវឌ្ឍសមត្ថភាពនៃការគិតរបស់អ្នកឲ្យបានកាន់តែរីកចម្រើន និងជួយឲ្យការលក់របស់អ្នកកាន់តែទទួលបានជោគជ័យផងដែរ។
អត្ថបទទាក់ទង
មេរៀន ៦ យ៉ាងសម្រាប់អ្នកលក់ ដើម្បីបង្កើតទំនាក់ទំនងល្អជាមួយអតិថិជន