កំហុសឆ្គង ចំនួន៧ ដែលអ្នកគ្រប់គ្រងគួរចៀសវាង

បុគ្គលិកច្រើនគួរសមដែរចាកចេញពីកន្លែងធ្វើការមួយ មិនមែនដោយសារតែមិនស្រលាញ់ការងារទេ តែគឺដោយសារតែបញ្ហារវាងខ្លួន និងអ្នកគ្រប់គ្រង ឬម្ចាស់អាជីវកម្មនោះ។ ជា​ទូទៅ​ វិវាទ​ការងារ​រវាង​អ្នក​ដឹកនាំ និងបុគ្គលិក​តែង​កើត​មាន​ឡើង​ពី​កត្តា​មួយ​ចំនួន​ជុំវិញ​ទំនាស់​ផលប្រយោជន៍នៅ​ក្នុង​ការងារ​នេះ​តែម្តង។ ​អ្នក​គ្រប់គ្រង​​ខ្លះ ​បាន​មើល​រំលង​សមត្ថភាព​បុគ្គលិក ​តែ​ចូលចិត្ត​លើក​តម្កើង​ខ្លួន​ឯង​ជាធំ គិត​ថា​ខ្លួន​ឯង​ត្រូវ​គ្រប់​យ៉ាង មិន​យូរ​មិន​ឆាប់​ក្រុមហ៊ុន​នោះ​នឹង​សល់​តែ​​ស្បែក​នឹង​ឆ្អឹង​ជា​មិន​ខាន។ ហេតុដូច្នេះ​ហើយ ​ក្នុង​នាម​ជា​អ្នក​គ្រប់គ្រង​ល្អ ​មិន​មែន​ជា​រឿង​មួយ​ងាយស្រួល​នោះ​ឡើយ ​ពោល​គឺ​ត្រូវ​​បង្កើត​ឲ្យមាន​ប្រសិទ្ធភាព​ក្នុង​​លទ្ធផល និងទំនាក់ទំនង​ការងារ តម្លាភាព​រវាង​បុគ្គលិក​ម្នាក់​ទៅ​បុគ្គលិក​ម្នាក់​ទៀត​ជា​ដើម ដើម្បី​ឲ្យ​ស្ថាប័ន​​ទាំងមូល​បោះ​ជំហាន​ទៅ​មុខដោយរលូន។

១. គ្រប់គ្រងល្អិតល្អន់ពេក

ទោះបីជាពួកគាត់ជាបុគ្គលិកក៏ដោយ ក៏ពួកគាត់មិនគួរត្រូវបានអ្នកគ្រប់គ្រងតាមដានល្អិតពីសកម្មភាពការងាររបស់គាត់ជាប់ដែរ។ ការធ្វើបែបនេះ គឺជាការមិនអោយតម្លៃដល់បុគ្គលិកនិមួយៗក្នុងការបំពេញការងារទៅតាមសមត្ថភាពរបស់ពួកគេ ហើយប្រៀបដូចជាការធ្វើអោយគេយល់ថា យើងជាមនុស្សដែលគិតថាមានតែខ្លួនទេដែលអាចសម្រេចកិច្ចការបាន ចំណែកឯបុគ្គលិករបស់ខ្លួន គឺទាល់តែចាំប្រាប់ជាប់ជានិច្ចទើបធ្វើកិច្ចការនោះបាន។

២. គ្មានមនោសញ្ចេតនាទៅកាន់បុគ្គលិក

អ្នកដឹកនាំល្អ គឺជាបុគ្គលដែលអាចគ្រប់គ្រងអារម្មណ៍របស់ខ្លួនបានល្អនៅពេលជួបឧបសគ្គ ហើយអ្នកគ្រប់គ្រងល្អក៏ចេះបង្ហាញពីការអាណិតស្រលាញ់ និងយកចិត្តទុកដាក់ទៅកាន់អ្នកដែលនៅជុំវិញខ្លួនដែរ។ ប្រសិនបើអ្នកចេះតែប្រើមនុស្សតែមិនចេះយល់ដឹងសុខទុក្ខរបស់ពួកគេ មិនខ្វាយខ្វល់ពីបញ្ហាសុខភាព បញ្ហាបន្ទាន់ ឬបញ្ហាគ្រួសារដែលពួកគាត់ជួបប្រទះនោះទេ ទំនាក់ទំនងរវាងអ្នក និងបុគ្គលិក គឺបានត្រឹមតែនៅកន្លែងធ្វើការហើយក៏មិនយូរអង្វែងឡើយដែរ។

៣. មើលរំលងស្នាដៃរបស់បុគ្គលិក

មនុស្សគ្រប់រូបសុទ្ធតែចង់បានការលើកសរសើរ ឬទទួលស្គាល់នូវស្នាដៃរបស់ខ្លួននៃពេលដែលពួកគាត់ធ្វើកិច្ចការណាមួយបានល្អ។ ប្រសិនបើពេលបុគ្គលិកធ្វើបានល្អតាមគោលដៅ ឬលើសពីគោលដៅដែលបានកំណត់ហើយ អ្នកគួរតែការលើកទឹកចិត្តមិនថាតិចតួច ឬច្រើនក្ដី សំខាន់គឺធ្វើអោយពួកគាត់ដឹងថាអ្នកទទួលស្គាល់ផលវិជ្ជមានក្នុងការងារ។ អ្នកគ្រប់គ្រងខ្លះ ពេលបុគ្គលិកធ្វើបានល្អ ក៏ធ្វើជាមិនដឹងមិនឮ តែបើធ្វើខុសបន្ដិចបន្ដួច គឺរករឿងមិនចេះចប់ ហើយការគ្រប់គ្រងបែបនេះមិនយូរមិនឆាប់បុគ្គលិកនឹងរត់ចោលអស់មិនខាន។

៤. មិនទុកចិត្តបុគ្គលិកខ្លួនឯង

ការបែកបាក់ទំនាក់ទំនងរវាងមនុស្សពីរនាក់មិនថាជាស្នេហា មិត្តភាព ឬទំនាក់ទំនងការងារ គឺកើតឡើងដោយសារការមិនទុកចិត្តគ្នាទៅវិញទៅមក។ នៅពេលដែលអ្នកមិនទុកចិត្តបុគ្គលិកដែលខ្លួនជាអ្នកជ្រើសរើសអោយមកធ្វើការដោយខ្លួនឯងហើយនោះ មិនយូរមិនឆាប់ពួកគេគង់តែដឹងពីការមិនទុកចិត្តរបស់អ្នកតាមរយ:សកម្មភាពតាមដានទៅលើពួកគេ។ ពេលដឹងហើយ បុគ្គលិកខ្លះនឹងមិនធ្វើការបានល្អឡើយ ព្រោះខ្លាចខុស ហើយខ្លះទៀតក៏មានការអាក់អន់ចិត្ត ព្រោះទោះខ្លួនធ្វើល្អប៉ុណ្ណា ក៏គ្មានអ្នកឲ្យតម្លៃ ឬមិនចុះសម្រុងរវាងបុគ្គលិក និងអ្នកគ្រប់គ្រង ហើយជាលទ្ធផល គឺផលិតភាពការងារធ្លាក់ចុះដោយសារតែការមិនទុកចិត្តគ្នានេះឯង។

៥. ធ្វើ​ខ្លួន​ជា​អ្នក​ចេះ​ដឹង​គ្រប់​រឿង​ទាំងអស់

នៅ​ពេល​ដែល​បុគ្គលិក​​ម្នាក់​​មាន​មុខតំណែង​ជា​អ្នក​គ្រប់គ្រង បុគ្គល​នោះ​ប្រហែល​ជា​គិត​ថា ខ្លួន​មាន​​​​​គំនិត​ល្អ និងសមត្ថភាព​​គ្រប់គ្រាន់​សម្រាប់​​កាន់​​មុខ​តំណែង​នេះ​។ យ៉ាងណាមិញ ​សូម​​​កុំ​ភ្លេច​ថា បុគ្គលិក ឬ កូនចៅ​​ខ្លួន​ក៏​មានគំនិត​ល្អៗ​ដូច​​​ខ្លួន​ដែរ។ ប្រសិន​បើ​អ្នក​គ្រប់គ្រង​គិត​​ថា​ខ្លួន​គឺ​ជា​មនុស្ស​តែ​មួយ​គត់​ឈាន​មុខ​គេ និង​ដឹង​គ្រប់​រឿង​ ឬភាសា​ម្យ៉ាង​ទៀត​ថា​ ចេះ​តែ​ឯង​​នោះ ​​នៅ​ទី​បំផុត​ ​មិន​យូរ​មិន​ឆាប់​សូម​​​ត្រៀម​យក​លិខិត​លាឈប់​ពី​បុគ្គលិក​ឲ្យហើយ​ទៅ។ យ៉ាងណាមិញ ​អ្នក​គ្រប់គ្រង​​អាច​រក្សា​​​ទំនាក់ទំនង​ការងារ​ល្អ​ប្រសើរ​តាម​រយៈ​​ផ្តល់​ឱកាស​ឲ្យ​ពួកគេម្នាក់ៗ​​បញ្ចេញ​ទស្សនៈ គំនិត​យោបល់ និងសំណើ​ជា​មតិ​រិៈគន់​មួយ​ចំនួន​សំដៅ​ធ្វើ​ឲ្យ​សមិទ្ធផល​ការងារ​កាន់តែ​ប្រសើរ​ឡើង។ ​

៦. បង្កើត​ការ​សម្រេចចិត្ត​ខុស

វា​ជា​រឿង​ល្អ​នៅ​ពេល​ដែល​អ្នកគ្រប់គ្រង​មួយ​រូប ​គឺ​​​ជា​​មិត្តភក្ដិ​​ស្និទ្ធស្នាល​នៃ​បុគ្គលិក​របស់​ខ្លួន​។ ប៉ុន្តែ​អ្វី​ដែល​សំខាន់ទៀត​នោះ​ គឺ​ត្រូវ​ចាំ​ថា បុគ្គល​នោះ​នៅ​តែ​ជា​អ្នក​គ្រប់គ្រង​​​របស់​ពួកគេ។ ហេតុដូច្នេះ​ រាល់​ការ​សម្រេចចិត្ត​ក្នុង​ការងារវា​ប្រាកដ​ណាស់​ដែល​ថា ​​​ក្នុង​នាម​ជា​អ្នក​គ្រប់គ្រង​ ការ​សម្រេចចិត្ត​របស់​​ខ្លួន​ត្រូវ​​ធ្វើ​ឡើង​​ឲ្យ​មាន​ភាព​ស៊ីចង្វាក់​បំផុតទៅ​នឹង​​អ្វី​ដែល​ជា​ការ​លើកឡើង​របស់​ពួកគេ​ម្នាក់ៗ។ នេះ​មិនមែន​ជា​អ្វី​ដែល​អ្នក​​គ្រប់គ្រង​ទាំងអស់​ត្រូវ​សម្រេច​ចិត្ត​ដោយ​ឯកឯង ហ៊ាន​អារកាត់​ដោយ​មិន​បាន​ពិភាក្សាជាមុន​​នោះ​ឡើយ ព្រោះ​ថា​បុគ្គលិក​ពេល​ខ្លះ​​ចង់​បញ្ចេញ​មតិ​យោបល់​ និងចង់​បាន​​​​ចម្លើយ​ពិតប្រាកដ​ ទោះបី​ជាចម្លើយ​នោះ​មិន​ល្អ​ស្តាប់​ ឬក៏​ជា​ព័ត៌មាន​មិន​ល្អ​ក៏ដោយ។ យ៉ាងណាមិញ បើ​​អ្នកគ្រប់គ្រង​ជៀសវាង​បញ្ហា​នេះ​ដោយ​ហេតុ​ថា​ចង់​ឲ្យ​បុគ្គលិក​គ្រប់គ្នា​ស្រលាញ់ នេះ​មិន​ត្រឹមតែ​ផ្តល់​ទុក្ខទោស​ដល់​ខ្លួន​ឯង​ប៉ុណ្ណោះ​ទេ ថែមទាំង​ផ្តល់​ផលវិបាក​ដល់​ក្រុមហ៊ុន​ទាំង​មូល​ទៀត​ផង។

៧. និយាយ​កុហក​ច្រើន

មិន​ចំពោះ​ថា​អ្នក​គ្រប់គ្រង​នោះ​ជា​អ្នក​ដឹកនាំ​​ ហើយ​បាន​និយាយ ឬពិភាក្សា​អ្វី​ក៏ដោយ​​ គ្មាន​ហេតុផល​ណា​មួយដែល​​ខ្លួន​បង្ហាញ​ភាព​មិន​ស្មោះត្រង់​ដល់​បុគ្គលិក​នោះ​ឡើយ។ ​អ្នក​គ្រប់គ្រង​​ល្អ មិន​ត្រូវ​មាន​អ្វី​ជា​អាថ៌កំបាំង​ ឬយកលេស​ច្រើន​គ្មាន​ហេតុផល​​នោះ​ទេ​។ ផ្ទុយ​ទៅវិញ​អ្នក​គ្រប់គ្រង​​ល្អ ​គឺ​ជា​អ្នក​គ្រប់គ្រង​ដែល​ពោរពេញ​ដោយ​សុចរិត​ភាព និង មាន​ទំនាក់ទំនង​ល្អ​ជា​មួយ​បុគ្គលិក​គ្រប់​ជាន់​ថ្នាក់។ ហេតុ​ដូច្នេះ​​​អ្នក​គ្រប់គ្រង​ ត្រូវ​ជៀសវាង​បញ្ហា​ភូត​កុហក​នេះ បើ​មិន​ដូច្នេះ​ទេ ​ខ្លួន​នឹង​បាត់បង់​ទំនុកចិត្ត និងការ​គោរព​ពី​​ក្រុម​ការងារ​​របស់​ខ្លួន​​ជា​មិន​ខាន។ ​


អត្ថបទទាក់ទង

តើធ្វើដូចម្ដេចដើម្បីវាស់វែងការអនុវត្តការងារបុគ្គលិកប្រកបដោយប្រសិទ្ធភាព?

 

Leave a Reply