ជាទូទៅ ពេលវេលា សំដៅទៅលើការវាស់វែងនៃរយៈពេល និងលំដាប់នៃព្រឹត្តិការណ៍ ឬសកម្មភាព។ វាពាក់ព័ន្ធនឹងការយល់ដឹងថាតើពេលណាត្រូវចាប់ផ្តើម ផ្អាក ឬបញ្ឈប់អ្វីមួយ ដើម្បីសម្រេចបានលទ្ធផលជាក់លាក់មួយក្នុងរយៈពេលជាក់លាក់ណាមួយ។ ពេលវេលាល្អ តែងតែដើរតួនាទីយ៉ាងសំខាន់ក្នុងភាពជោគជ័យ និងផលិតភាព។ នៅក្នុងអត្ថបទនេះ យើងនឹងនិយាយអំពីការគ្រប់គ្រងពេលវេលា និងគន្លឹះមួយចំនួនដើម្បីគ្រប់គ្រងពេលវេលារបស់អ្នកប្រកបដោយប្រសិទ្ធភាព។
ការគ្រប់គ្រងពេលវេលា សំដៅលើដំណើរការនៃការរៀបចំផែនការ និងការគ្រប់គ្រងពីរបៀបដែលអ្នកចំណាយពេលវេលាលើសកម្មភាពមួយចំនួន ដើម្បីសម្រេចបាននូវការងារកាន់តែច្រើនក្នុងរយៈពេលតិច និងសម្រេចបាននូវគោលដៅ។ ការគ្រប់គ្រងពេលវេលាប្រកបដោយប្រសិទ្ធភាព អាចជួយបង្កើននូវការជឿជាក់ ផលិតភាព និងប្រសិទ្ធភាពរបស់អ្នក កាត់បន្ថយភាពតានតឹង បង្កើនការផ្តោតអារម្មណ៍របស់អ្នក ធ្វើឲ្យប្រសើរឡើងនូវតុល្យភាពរវាងជីវិត និងការងាររបស់អ្នក និងនាំមកនូវឱកាសសម្រាប់ការលូតលាស់ផ្ទាល់ខ្លួន។
តើមានគន្លឹះអ្វីខ្លះដើម្បីគ្រប់គ្រងពេលវេលាឲ្យមានប្រសិទ្ធភាព?
ការរៀបចំការងាររបស់អ្នក
ខួរក្បាលរបស់យើងត្រូវការពេលវេលាដើម្បីសម្របទៅតាមប្រភេទផ្សេងៗនៃការងារ។ នៅពេលដែលអ្នកផ្លាស់ប្តូរភ្លាមៗពីកិច្ចការមួយប្រភេទ ទៅកិច្ចការមួយប្រភេទទៀត ខួរក្បាលរបស់អ្នកនឹងត្រូវការពេលបន្តិចសម្របទៅតាមការផ្លាស់ប្តូរនោះ។ អ្នកអាចសាកល្បងដាក់កិច្ចការស្រដៀងគ្នានៅក្នុងក្រុមជាមួយគ្នា ដើម្បីបង្កើនប្រសិទ្ធភាព។ ជាឧទាហរណ៍ អ្នកអាចឆ្លើយតបទៅកាន់អ៊ីម៉ែលរបស់អ្នកទាំងអស់ ឬ រៀបចំរបាយការណ៍របស់អ្នកទាំងអស់ក្នុងពេលតែមួយ មុននឹងចាប់ផ្តើមអនុវត្តកិច្ចការផេ្សង។
ការបង្កើតកាលវិភាគ និងបញ្ជីកិច្ចការដែលត្រូវធ្វើ
បញ្ជីកិច្ចការដែលត្រូវធ្វើជួយផ្តល់នូវរចនាសម្ព័ន្ធ និង ភាពច្បាស់លាស់ដល់ការងាររបស់អ្នក។ អ្នកអាចកំណត់អាទិភាពនៃកិច្ចការនីមួយៗដោយការរាយកិច្ចការទាំងនោះក្នុងបញ្ជី និង កំណត់ថាការងារណាសំខាន់ ឬបន្ទាន់បំផុត។ វិធីនេះជួយធានាថាអ្នកកំពុងដោះស្រាយរឿងសំខាន់ៗជាមុនសិន។ អ្នកក៏អាចប្រើប្រាស់កាលវិភាគដើម្បីកំណត់ថាតើត្រូវចំណាយពេលវេលាប៉ុន្មានសម្រាប់កិច្ចការនីមួយៗ។
ការតាមដានពេលវេលារបស់អ្នក
មុននឹងអ្នកអាចគ្រប់គ្រងពេលវេលារបស់ខ្លួនប្រកបដោយប្រសិទ្ធភាព អ្នកត្រូវយល់ដឹងពីភារកិច្ចទាំងអស់ដែលត្រូវការប្រើប្រាស់ពេលវេលានោះ។ តាមដានសកម្មភាពរបស់អ្នករយៈពេល ពីរ-បី ថ្ងៃដើម្បីកំណត់នូវកត្តាដែលបង្កឱ្យមានការខ្ជះខ្ជាយពេលវេលា និង កន្លែងដែលអាចការកែលម្អបាន។
ការប្រើប្រាស់ឧបករណ៍ជំនួយគ្រប់គ្រងពេលវេលា
សព្វថ្ងៃនេះមានកម្មវិធីទាក់ទងទៅនឹងផលិតភាព និង ឧបករណ៍គ្រប់គ្រងពេលវេលាជាច្រើនដែលអាចប្រើបាន ដូចជាកម្មវិធីបញ្ជីកិច្ចការដែលត្រូវធ្វើ កម្មវិធីតាមដានពេលវេលា ឬកម្មវិធីប្រតិទិន (Outlook, Google Tasks, Google Calendar, Toggl Track) ជាដើម។ អ្នកអាចប្រើឧបករណ៍ទាំងនេះដើម្បីកំណត់ពេលវេលាសម្រាប់អនុវត្តកិច្ចការណាមួយជាមុន និង កំណត់ការរំលឹកសម្រាប់ពេលដែលការផុតកំណត់ខិតចូលមកដល់។
ការបំបាត់ការរំខាន
សូម្បីតែការសម្លឹងមើលទូរសព្ទរបស់អ្នកបន្តិច ឬការសន្ទនាខ្លីៗក៏អាចរំខានដល់ការផ្តោតអារម្មណ៍របស់អ្នកយ៉ាងខ្លាំងដែរ។ ដូចដែលបានរៀបរាប់ខាងលើ ខួរក្បាលរបស់អ្នកត្រូវការពេលវេលា និង ថាមពលដើម្បីផ្តោតលើកិច្ចការត្រូវអនុវត្ត ។ ប្រសិនបើមានការរំខាន វាអាចនាំឱ្យមានការខ្ជះខ្ជាយពេលវេលា និង ថាមពល។ វិធីនេះជួយឱ្យអ្នកផ្តោតលើកិច្ចការបច្ចុប្បន្ន និង ផ្តោតការយកចិត្តទុកដាក់ទៅលើការងាររបស់ខ្លួន។ អ្នកអាចបិទសម្លេងទូរសព្ទ ហើយទុកសារដែលមិនសំខាន់ ដើម្បីពិនិត្យមើលនៅពេលក្រោយ។
ការរក្សាកន្លែងធ្វើការរបស់អ្នកឱ្យស្អាត និងមានសណ្តាប់ធ្នាប់
តុធ្វើការដែលរញ៉េរញ៉ៃអាចរំខានដល់ភ្នែក ធ្វើឱ្យអ្នកពិបាកក្នុងការផ្តោតអារម្មណ៍ទៅលើការងារដែលកំពុងអនុវត្ត។ កន្លែងធ្វើការដែលមិនមានសណ្តាប់ធ្នាប់អាចនាំឱ្យខ្ជះខ្ជាយពេលវេលានៅពេលត្រូវការស្វែងរកឯកសារសំខាន់ៗ ឬឧបករណ៍ដែលបាត់។ ការមានកន្លែងទុកដាក់វត្ថុនីមួយៗត្រឹមត្រូវនឹងអនុញ្ញាតឱ្យអ្នកស្វែងរកអ្វីដែលកំពុងត្រូវការបានយ៉ាងឆាប់រហ័ស និង ប្រកបដោយប្រសិទ្ធភាព។ លើសពីនេះទៅទៀត កន្លែងធ្វើការដែលមានរបៀបរៀបរយក៏នឹងជួយឱ្យអ្នកមានផាសុកភាពពេលកំពុងធ្វើការផងដែរ។
ការសម្រាក និងបញ្ចូលថាមពលឡើងវិញ
កំណត់ពេលសម្រាកខ្លីៗ ដើម្បីចៀសវាងការអស់កម្លាំងខ្លាំង។ អ្នកអាចក្រោកឡើង ចេញទៅខាងក្រៅ ឬធ្វើអ្វីមួយបន្ធូរអារម្មណ៍ដើម្បីរក្សាភាពស្រស់ស្រាយ និងកាត់បន្ថយភាពតានតឹង។ ចិត្តស្ងប់ស្ងាត់ និងវិជ្ជមាន ជួយអ្នកដោះស្រាយនូវឧបសគ្គ និងរក្សាការផ្តោតអារម្មណ៍ឱ្យកាន់តែប្រសើរឡើង។ ជាឧទាហរណ៍ អ្នកអាចកំណត់ការអនុវត្តការងារពី ៤៥ – ៥៥ នាទី ហើយសម្រាកមួយភ្លែតប្រហែល ៥ នាទី ដើម្បីសម្រាកខួរក្បាល មុននឹងបន្តការអនុវត្តការងារបន្តទៀត។
សៀវភៅ ការគ្រប់គ្រង និងអភិវឌ្ឍស្ថាប័ន
