ដំណាក់កាលសំខាន់ៗទាំង ៥ នៃវដ្តជីវិតរបស់គម្រោង

គម្រោង​ គឺជា​ការ​ប្រមូលផ្ដុំ​នៃ​សកម្មភាព​ជា​ច្រើន​ដែល​ពាក់ព័ន្ធ​គ្នា ដែល​នឹង​ត្រូវ​អនុវត្ដ​តាម​បែបបទ​ដែល​បាន​រៀបចំ​រួច​ជា​ស្រេច ដោយ​មាន​ចំណុច​ចាប់ផ្ដើម និង​បញ្ចប់​ច្បាស់លាស់។ គោលបំណង​របស់​គម្រោង ​គឺ​ធ្វើ​យ៉ាង​ណា​ឱ្យ​សម្រេច​បាន​នូវ​លទ្ធផល​ជាក់លាក់ ដើម្បី​បំពេញ​តាម​តម្រូវការ​យុទ្ធសាស្ដ្រ​របស់​ស្ថាប័ន​មួយ។ ការងារ​របស់​គម្រោង ​គឺ​លើស​ពី​សកម្មភាព​អាជីវកម្ម​ធម្មតា​របស់​ស្ថាប័ន​មួយ។ សកម្មភាព​នានា​របស់​គម្រោង​ មាន​ទំនាក់ទំនង​ជា​លំដាប់​លំដោយ ពោល​គឺសកម្មភាព​ជាក់ស្ដែង​មួយ​ចំនួន​ត្រូវ​តែ​ធ្វើ​ឱ្យ​រួចរាល់ មុន​នឹងសកម្មភាព​ថ្មី​មួយទៀត​អាច​ចាប់ផ្ដើម​បាន ដោយ​ផ្អែក​លើ​លក្ខណៈ​បច្ចេកទេស ឬ​រដ្ឋបាល។

គម្រោងនីមួយៗ តែងមានវដ្តជីវិត ដែលមានរចនាសម្ព័ន្ធលក្ខណៈមួយជំហានម្តងៗ ដើម្បីដឹកនាំគម្រោងនីមួយៗចាប់ផ្តើមពីគំនិតដំបូង រហូតដល់ការបញ្ចប់ដោយជោគជ័យ។ នៅក្នុងវដ្តជីវិតនោះ អ្នកគ្រប់គ្រងគម្រោង ត្រូវទទួលបន្ទុកលើការរៀបចំផែនការ ត្រួតពិនិត្យ និង គ្រប់គ្រងវឌ្ឍនភាពរបស់ក្រុមរបស់ខ្លួន ដើម្បីធ្វើឱ្យមានភាពប្រាកដថាគម្រោងនេះនឹងត្រូវបានបញ្ចប់ទាន់ពេលវេលា និងស្ថិតក្នុងគម្រោងថវិកា។ ដំណាក់កាលសំខាន់ៗទាំង ៥ នៃវដ្តជីវិតរបស់គម្រោង មានដូចជា៖

ជំនាញសំខាន់ៗទាំង ៣ របស់អ្នកគ្រប់គ្រង

ការចាប់ផ្តើមគម្រោង

នេះគឺជាដំណាក់កាលដំបូងនៅក្នុងវដ្តជីវិតនេះ។ នៅក្នុងដំណាក់កាលនេះ គម្រោង ត្រូវបានកំណត់ ហើយការវិភាគលទ្ធភាពត្រូវបានធ្វើឡើងក្នុងគោលបំណងកំណត់ថាតើគម្រោងនេះគួរត្រូវបានអនុវត្ត ឬមិនត្រូវបានអនុវត្ត។ អ្នកគ្រប់គ្រងគម្រោង ក៏ត្រូវបានចាត់តាំងនៅក្នុងដំណាក់កាលនេះផងដែរ។ នៅពេលដែលគម្រោងត្រូវបានអនុម័ត សេចក្តីថ្លែងការគម្រោងត្រូវបានបង្កើតឡើងដើម្បីបញ្ជាក់អំពីវិសាលភាព គោលដៅ និងតម្រូវការនៃគម្រោង។ ភាគីពាក់ព័ន្ធសំខាន់ៗ ដែលរាប់បញ្ចូលទាំងបុគ្គល និងក្រុមការងារទាំងអស់ដែលត្រូវចូលរួមក្នុងគម្រោងនេះ ក៏ត្រូវបានកំណត់អត្តសញ្ញាណនៅក្នុងដំណាក់កាលនេះផងដែរ។

ការធ្វើផែនការគម្រោង

នៅក្នុងដំណាក់កាលនេះ គម្រោងបានចេញពីដំណាក់កាលនៃការចាប់ផ្តើម ហើយប្រែក្លាយទៅជាផែនការសកម្មភាពលម្អិត។ ផែនការនៃគម្រោង ត្រូវបានបង្កើតឡើង បញ្ជាក់ពីកិច្ចការជាក់លាក់ដែលត្រូវអនុវត្ត ធនធានដែលត្រូវការ (បរិក្ខារ ថវិកា…….) កាលវិភាគនៃគម្រោង គោលដៅ និង ផែនការទំនាក់ទំនង។ និយាយឱ្យសាមញ្ញ ផែនការនេះ ដើរតួជាផែនទីដែលបង្ហាញយ៉ាងច្បាស់អំពីរបៀបដែលគម្រោងនេះនឹងត្រូវបានអនុវត្ត តើអ្នកណានឹងធ្វើអ្វី ពេលណាដែលត្រូវធ្វើ និងត្រូវចំណាយអស់ប៉ុន្មាន។ 

ការអនុវត្តគម្រោង

នៅក្នុងដំណាក់កាលនេះ ផែនការនៃគម្រោង ត្រូវបានដាក់ឱ្យដំណើរការជាផ្លូវការ។ ក្រុមការងារ ត្រូវអនុវត្តនូវភារកិច្ចដូចដែលបានកំណត់ក្នុងផែនការ។ ភារកិច្ច និងទំនួលខុសត្រូវទាំងអស់ ត្រូវបានចាត់ចែងយ៉ាងត្រឹមត្រូវដល់អ្នកដែលមានជំនាញ និងចំណេះដឹងពាក់ព័ន្ធ ខណៈពេលដែលអ្នកគ្រប់គ្រងគម្រោងត្រូវធានាថាការប្រាស្រ័យទាក់ទងក្នុងក្រុមមានការប្រកបដោយប្រសិទ្ធភាព ដោះស្រាយជម្លោះ ព្រមទាំងផ្តល់ការគាំទ្រ និងការណែនាំចាំបាច់ទៅដល់សមាជិកក្រុម។ អ្នកគ្រប់គ្រងគម្រោង ក៏មានទំនួលខុសត្រូវក្នុងការធានាទៅលើការប្រាស្រ័យទាក់ទងរវាងក្រុមការងារ និងភាគីពាក់ព័ន្ធគម្រោង រួមជាមួយការរក្សាបាននូវរំហូរការងារប្រកបដោយប្រសិទ្ធភាព។ 

ការត្រួតពិនិត្យ និងការគ្រប់គ្រងគម្រោង

ដំណាក់កាលនេះ ធានាថាអ្វីៗទាំងអស់ត្រូវប្រកាន់ខ្ជាប់ទៅតាមផែនការនៃគម្រោង និងការពារបញ្ហាណាមួយដែលអាចមានផលប៉ះពាល់អវិជ្ជមានដល់ការអនុវត្តគម្រោង។ នៅក្នុងដំណាក់កាលនេះ អ្នកគ្រប់គ្រងគម្រោង បង្កើតឡើងនូវសូចនាករសមិទ្ធកម្មគន្លឹះ (KPIs) ដើម្បីវាស់ស្ទង់ការអនុវត្តគម្រោងធៀបទៅនឹងគោលដៅដែលបានកំណត់។ អ្នកគ្រប់គ្រងគម្រោង ក៏ត្រូវតែតាមដានទៅលើប្រតិបត្តិការគម្រោងជាប្រចាំ ដើម្បីប្រាកដថាគម្រោងនោះកំពុងដំណើរការដូចការគ្រោងទុក។ ប្រសិនបើមានអ្វីខ្វះខាត នោះអ្នកគ្រប់គ្រងគម្រោងត្រូវតែធ្វើការកែតម្រូវជាចាំបាច់ ដើម្បីបំពេញតាមស្តង់ដាគុណភាពដែលត្រូវបានកំណត់។

ការបិទបញ្ចប់គម្រោង

នេះគឺជាដំណាក់កាលចុងក្រោយ និងសំខាន់មួយដែលមិនគួរមើលរំលង។ នៅក្នុងដំណាក់កាលនេះ អ្នកគ្រប់គ្រងគម្រោង បញ្ចប់គម្រោងនោះជាស្ថាពរ ហើយត្រូវធានាថាអ្វីៗទាំងអស់ត្រូវបានបញ្ចប់យ៉ាងត្រឹមត្រូវ ដោយការផ្តល់ជូននូវផលិតផលចុងក្រោយ (Final Product) បញ្ចប់នូវឯកសារ បិទកិច្ចសន្យា និងទូទាត់រាល់ការបង់ប្រាក់ទាំងអស់ ។ល។ ប៉ុន្តែគម្រោងមិនទាន់បញ្ចប់ត្រឹមនេះទេ។ ក្រុមការងារ គួរតែចំណាយពេលខ្លះដើម្បីជញ្ជឹងគិតពីដំណើរការគម្រោងទាំងមូល ដោយពិភាក្សាអំពីអ្វីដែលបានអនុវត្តទៅតាមផែនការ និងអ្វីដែលមិនបានអនុវត្តទៅតាមផែនការ ព្រមទាំងឧបសគ្គទាំងឡាយដែលបានចួបប្រទះ និងចំណុចណាដែលអាចកែលម្អបានសម្រាប់គម្រោងនាពេលអនាគត។

សៀវភៅ ការគ្រប់គ្រង និងអភិវឌ្ឍស្ថាប័ន

សៀវភៅ ជំនាញការគ្រប់គ្រង